Polis a detene atracado riba pareha turista

ORANJESTAD - Den cuadro di e investigacion cu a start for di den fin di siman caba, Cuerpo Policial Aruba ta anuncia cu un rato pasa a detene e prome sospechoso den caso di atraco arma riba un pareha turista den fin di siman. E detencion a tuma luga na San Nicolas y e sospechoso ta di inicial R.C. E investigacion ta den man di e departamento cu ta investiga atraconan den Cuerpo Policial. Nan a haci uzo di e ekipo di TBP pa realisa e detencion. E investigacion no ta cla ainda, pa cual no por descarta cu mas detencion lo cay den e siguiente oranan y dianan. Pa cualkier ciudadano cu tin mas informacion of cu sa kende(nan) ta envolvi den e caso di atraco aki, por tuma contacto cu Recherchenan of por yama tipline di Polis na 11141. Cuerpo Policial Aruba no por garantisa cu ta preveni atraconan tuma luga. Locual so por garantisa comunidad y e antisocialnan cu ta haci esaki, cu lo uza tur forsa di ley, uzando tur ekipo y experencia den cas, pa investiga y persigui esunnan cu ta comete e tipo di atentadonan asina contra nos isla y nos economia.