Problemanan laboral no a stroba Riu Palace di gana premio

NEW YORK – Mientras cu localmente e hotel tabata den mal noticia pa loke ta situacionnan laboral, internacionalmente e ta sigui gana premio. Riu Palace hotel, a caba gana su di tres Golden Apple Awards di Apple Vacations, pa e servicio cordial cu e turistanan ta ricibi, y e programa cu e hotel tin pa e huespednan. Pues e problemanan laboral no ta stroba e hotel di briya internacionalmente, unda cu e trahadonan ta esnan cu ta logra esaki pa e hotel.

MAS PROPIEDAD

Banda di Riu Palace Aruba, un total di 20 otro hotel di e mesun cadena, a logra e premio aki. Ta trata di hotelnan RIU na e.o. México (10), Republica Dominicana (4), Jamaica (2), Panamá (1), St. Martin (1) y Bahamas (1). Tur a ricibi un premio Apple.

PREMIO CODICIA

E Golden Apple Award ta figura entre e premionan mas codicia den e industria turistico, y cu ta otorga a base di opinion di centenares di miles di biahero cu ta yena e encuestanan di Apple. Nan ta balora, e personal, e servicio, calidad di cuminda, actividadnan, e hotel, y mas.

PROBLEMA LABORAL

Ultimo lunanan e hotel ta den noticia negativo continuo, mayoria bez pa problemanan laboral. Si no ta maltrato di hefe, welga di trahado, problema di permiso, problema cu referendum, sindicato etc. No obstante esaki, e trahadonan ta sigui cumpli y ta mustra awor cu nan a logra pa e hotel gana otro premio grandi.