Xander Bogaerts nomina pa Best Breakout Player 2015

BOSTON – E pelotero profesional arubano Xander Bogaerts, -considera como e hungador mas consistente di su ekipo Boston Red Sox e temporada aki-, a keda nomina como un di e 12 hungadornan pa e premio Best Breakout Player 2015, cu lo keda entrega durante e asina yama 2015 Esurance MLB awards. Su prome quadrangular ayera nochi, su di 7 homerun di temporada, ta yuda e arubiano sigur pa e titulo aki.

TEMPORADA CAYENTE

Contrario na e temporada anterior unda cu Bogaerts a lucha pa keda consistente durante su prome temporada, e aña aki tur cos ta diferente p'e. Na homeplate, Bogaerts su bate tabata tremendamente cayente, batiendo un .321 cu 178 hits, 30 double, tres triple y awor 7 homerun y 73 careda empuha. Den defensa, e la haci un impacto similar, cometiendo apenas 8 eror den 612 hugada. Mayoria di nan, expectacular.

ESURANCE MLB AWARDS

Esurance MLB Awards anualmente ta honra e prestacionan miho di baseball grandes ligas, cu ta inclui 5 componente. Cada uno di nan ta conta pa 20% di voto total. E otro 11 nominadonan ta A.J. Pollock (D-backs), Manny Machado (Orioles), Nolan Arenado (Rockies), Lorenzo Cain (Royals), Jeurys Familia (Mets), Andrew Miller (Yankees), Brandon Crawford (Giants), Carlos Martinez (Cardinals), Chris Archer, Logan Forsythe (Rays) y Bryce Harper (Nationals).