Estado Falcon kier frena contrabanda di gasoline pa Aruba

PUNTO FIJO – Pa contraresta e contrabanda di extraccion di alimento y combustibel den e estado venezolano Falcon, gobernadora di e estado Stella Lugo a sera e frontera pa tal. Asina e portal noticias24 ta raporta recientemente. Aparentemente personanan (no ta specifica si ta Venezolano of Rubiano) ta sacando material pa Aruba, Bonaire y Corsou. Algo cu nan kier pa wordo para. Como tal a bin cu un plan special di seguridad na e frontera maritimo di e region aki.

OPERACION

Segun e informacion, funcionarionan di e asina yama Zona Operativa de Defensa Integral (Zodi) Marítima, a inicia e operacion pa atende cu e ilegalidad na e costa golfo di Venezuela.

ACCION

Recientemente, e gobernador a anuncia e accion, despues cu a detecta actividad ilegal pa islanan ABC, cu nan ta yama e zona caribense, y cu tabata sosode desde e municipio di peninsula di paraguana y costa oriental Falcon.

DIFICULTAD

Ta conoci cu pa varios tempo caba arubianonan cu ta biaha pa Punto Fijo, ta hayando nan mes cu problema ora di yega, y tambe ora di sali. Ta rekeri di nan un cantidad di documento extra cu antes no tabata necesario. Pero no ta conoci si enberdad nan a encontra problema ora cu nan drenta Aruba bek cu gasoline of otro artefacto.