Detenidonan di disturbio parlamento por lo pronto ta keda sera

ORANJESTAD – E tres detenidonan sospecha di ta participe den e disturbio dilanti parlamento dia 27 di augustus, por lo pronto ta keda deteni. Vocero di ministerio publico Ann Angela awe mainta a confirma na NoticiaCla.com cu ayera huez comisario a prolonga e detencion di cada un di e tres personanan aki cu no menos cu 30 dia mas. Esey ta nifica cu pa e proximo luna, -si nada nobo no sosode of bin dilanti-, nan lo keda sera na KIA pendiente e investigacion.

MAS DETENCION

Tabata un siman pasa ainda cu Angela a mustra na NoticiaCla.com cu si resulta for di e imagennan (tuma di e disturbionan di 27 di augustus 2015 na parlamento) cu mas investigacion ta necesario, anto lo bin mas investigacion. . “E caso ta sigui den investigacion di tur manera”, vocero di ministerio publico Ann Angela a sigura NoticiaCla.com.

IMAGENAN

E imagennan di cual Angela a referi na dje, ainda  ta wordo investiga y analisa segun Angela, y si for di e imagennan aki y-of for di e investigacion, resulta cu tin mas sospechoso, anto lo actua riba esey tambe. Segun Angela, esaki tin di haber met name cu e rumornan tocante un "schutter", esta un tirado. Tur esey mester tin mas claridad ariba pa diabierna awor. Te aworaki tin tres persona deteni ainda (na KIA) cu ta J.G, Rvd B, y F.S.G. E dosnan cu a haya nan libertad (por lo pronto) ta I.I.L y J. M.

MOTIVACION PA PROLONGACION

Motivacion di fiscal pa pidi pa prolongacion, ta pasobra e ta ‘relaciona cu e seriedad di e hechonan di cual nan ta wordo sospecha y cu mester mas investigacion”. Riba esaki e huez comisario lo dicidi dialuna awor.

E SUSESO

Despues di e disturbionan diahuebs ultimo, polis a detene 12 persona inicialmente, y despues a laga 7 bay. A keda 3 persona cu si no a recobra nan libertad y ainda ta sera. Nan a haya dos dia di inverzekeringstelling y 8 di prolongacion di esey. Awor esaki a keda cambia y aumenta cu 30 dia.