AHATA ta insisti pa mas presencia policial pa zona vulnerable

ORANJESTAD – AHATA (Aruba Hotel & Tourism Association) ta insisti pa mas presencia policial den zona vulnerable. Y sigur despues di e caso di e atraco di diasabra anochi den pleno zona turistico. Esey tin e asociacion hotelero precupa. Y e asociacion no a sconde nan desapunto den e suseso ultimo. “E ta un otro incidente desafortuna, cu ta reenforsa nos peticion pa un plan completamente integra, pa presencia di mas polis den areanan vulnerable” CEO di e asociacion, James Hepple, a bisa NoticiaCla.com dialuna. Segun e ehecutivo hotelero, ta apenas un siman pasa AHATA a haci e peticion ey na gobierno durante nan reunion riba e tema.

MAS POLIS

Minister di husticia Arthur Dowers mientrastanto, a sigura NoticiaCla.com di otro banda, cu debidamente ‘tin mas polis’ den e zonanan menciona. No ta conoci si e ta suficiente ni, si esaki ta conta cu sosten di AHATA, mirando cu AHATA ta insisti cu nan kier mira mas polis. Dowers a bisa dialuna cu ‘tin hopi mas polis’ na e zonanan ey. De hecho, den e zona ey tabatin mas polis presente cu normal segun e mandatario. E mandatario a mustra tambe cu e hecho cu tin mas polis, no necesariamente ta un garantia cu lo no tin mas atraco of cu e ta mengua. E la haci mencion di algun ehempel pa ilustra cu ni cu mas polis, toch e atracadonan no ta ria pa esaki. “Presencia di polis no ta wanta e atracadonan pa comete e atraco” Dowers a sigui bisa.

INVESTIGACION

Polis tin e caso di robo na e joyeria na Paseo Herencia den fin di siman den investigacion. Mas informacion extra polis no por a suministra dialuna mainta ainda. E ta keda un informacion delicado y problematico, mirando e area unda cu e robo a tuma lugar y e orario cu esaki a tuma lugar. Mirando cu e ta trata un area turistico hopi ocupa, no ta descarta cu e tabatin un efecto negativo riba e industria turistico.

E CASO MES

Manera ta conoci, polis a haya un melding di un dama diasabra anochi den careda di 7'or di anochi, di un robo na Kristal Jewelry na Paseo Herencia. Mesora centrale post a manda tur patruya den e region pa e sitio. Hunto cu e patruyanan, a manda e team di atraco, BFTO y slachtofferhulp. E caso tabata di 3 homber (mas sigur), arma cu arma y cu cara tapa, a atraca e joyeria aki. Segun informacion di polis, e atracadornan a horta un gran cantidad di joyas, aunke cu no a duna informacion oficialmente cuanto placa esaki ta traduci na dje. Informacionnan no confirma ta papia di un suma di 100 mil florin na joyas cu a wordo horta. Patruyanan a busca den becindario, pero no tabatin resultado. Como tal e atracadornan ainda ta fugitivo.