Hulanda y Aruba ta sigui diferencia riba conseho Raad van State

ORANJESTAD - E conseho di Raad van State riba e KB cu Aruba a haya aña pasa y cu, -for di e conseho por lo menos-, ta mustra cu Hulanda lo a ‘faya’, no a cambia e pensamento ni e discusion entre Hulanda y Aruba riba e tema. Tanto gobierno di Hulanda como esun di Aruba dialuna a duna nan comentario al respecto, y ambos ta para ariba cu nan (taba)tin rason ‘ainda’. Na Aruba gobierno a uza dos minister pa duna e version ‘oficial’, mientras cu na Hulanda e minister encarga a contesta Tweede Kamer riba e tema. NoticiaCla.com a compronde tambe cu awe minister Eman y Plasterk a reuni cu otro na Hulanda. Ta mas cu sigur cu a toca e tema ey, pero e resultado di e reunion no ta conoci pa NoticiaCla.com. 

ARUBA SU BISTA

“No por t’asina cu un pais grandi ta impone su mes riba un pais chikito, simplemente esey no por. E no ta cuadra cu decencia y ta bay en contra di e derecho fundamento di autodeterminacion. E intervencion di Hulanda aña pasa tabata indeseabel y manera Raad van State a bisa “ilegal”. Asina minister di husticia di Aruba Arthur Dowers a duna di conoce dialuna mainta den un conferencia di prensa. Segun Dowers, e loke ta para den e carta di Raad State, segun e mandatario, no tabata diferente di loke Aruba y expertonan a bisa caba despues di e sucedido aña pasa. Di tur manera “nos kier ilustra algun punto pasobra tin algun persona cu toch kier crea cierto esfera, hustificando loke a tuma luga”, Dowers a sigui bisa.

HULANDA SU BISTA

Minister hulandes Ronald Plasterk ta pensa otro. “E aanwijzing di conseho di minister di Reino pa Aruba tabata completamente segun procedura y regla” e vespertino Amigoe ta cita e mandatario dialuna. E vespertino a haya e reaccion via vocero di Plasterk dialuna. Segun e mandatario hulandes, e conseho di Raad van State, no ta aplicabel specificamente pa e aanwijzing pa Aruba, sino mas bien ta fungi como reglanan general pa e procedura cu tin cu sigui. “Pero aparte di esey, e aanwijzing a cay ,-segun Plasterk,- dentro di e margen huridico. Algo cu el a declara caba aña pasa den Tweede Kamer, indicando e tempo ey cu no a viola ningun autoridad di gobernador riba nivel insular, ya cu e mes ‘por a tuma e decision pa firma e presupuesto of presenta esaki pa ‘vernietiging’. Algo cu si ta un autoridad como representante di Reino. Riba e punto aki tambe Aruba y Hulanda ta diferencia di opinion cu otro. E autoridad cu gobernador (taba) tin e tempo ey.