Gobierno a aproba Mario Wever pa adjunct director DIMAS

ORANJESTAD – Mario Wever definitivamente lo bira e adjunct director na DIMAS. Un funcion cu dos luna pasa a crea un protesta di trahadonan di DIMAS cu no tabata contento cu e idea aki. Minister encarga cu e departamento ey, Benny Sevinger a confirma ayera na NoticiaCla.com cu Wever mes ta e persona cu e la presenta na conseho di minister, cu na su turno a aproba e nombracion. Ta solamente e screening ta tumando lugar aworaki pa e haya su nombracion oficialmente.

SIGUI RAPPORT DI PWC

Segun e mandatario, cu e nombracion di Wever, e ta simplemente cumpliendo cu e rapport traha pa Price Waterhouse Cooper PWC, cu a stipula cu mester di un adjunct director. Y como minister e la sigura NoticiaCla.com cu e tin e autorisacion pa nombra e persona cu e ta kere cu por ehecuta e funcion aki.

CAMBIONAN NA DIMAS

Tabata durante ultimo añanan, segun e mandatario, cu a bin cu cambionan creando unitnan pa atende tipo di permisonan. Den e caso aki, a pidi PWC pa traha un quick scan, cu a asumi tur e cambionan aden, incluyendo un organogram nobo. Y den e organogram, tabatin e adjunct director caba.

FUNCION OCUPA CABA

Segun Sevinger, Wever a bin ta ocupa e funcion aki ultimo añanan caba sin tin e nombracion, y como tal a presenta e candidato. Tur otro posicion cu falta ainda, ta wordo procesa y mester ‘stel vast’ algun funcionnan concreto, y tambe un funcion nobo di un visa kamer, pa cual lo tin un proceso interno di busca personal. “Na final tur hende na Dimas lo ta den e functie cu nan ta adecua y ekipa pa tin. Y e servicio pa publico lo ta mehora considerablemente na final di e ehercicio aki” Sevinger a bisa.

PROTESTA PA NOMBRACION

Tabata na mitar di juli ultimo cu situacion laboral na DIMAS tabata tenso. Tur esaki relaciona e tempo ey cu un informacion cu e personal a haya referente nombracion di Wever e tempo ey caba, como director adhunto. E tempo ey, nan a bisa cumientras cu personalmente no tin nada contra e persona, e hecho cu a nombr’e como un adjunct director sin pasa e proceso corecto, ta condenable. “E ora cu bo ta insultando e inteligencia di e trahadonan di DIMAS”. Asina e presidente di e sindicato TOPA cu ta representa e trahadonan di DIMAS, Rene Bernabela a bisa NoticiaCla.com dos luna pasa durante un accion chikito di e trahadonan pafo di edificio di DIMAS. E trahadonan manera anticipa, a dicidi di pone trabou abou (pa inicialmente un ora), pa protesta e desaroyo rond di nombracion Wever como director adjunct. Segun e trahadonan, Wever lo no tin e experiencia y /of papelnan necesario pe. Un nombracion cu a bin for di ‘ariba’, y cu no ta conta cu e mayoria di e trahadonan.

HURISTA

Segun Bernabela a bisa e tempo ey, tin yen di hurista na DIMAS cu por asumi e funcion. “Anto ainda riba dje, kier delega cierto funcion di e directora, y pone bou di e adjunct directeur. Esey no ta aceptabel!”, Bernabela a sigui bisa NoticiaCla.com. A reitera cu e punto ey lo wordo ‘bari for di mesa’ pasobra esey no por.

RAPPORT PWC

Loke mas ta indigna e sindicato, ta cu tin un rapport extenso di Price Waterhouse Coopers (cu segun trahadonan, a costa 245.000 florin pa traha), cu ta bisa cu mester tin un hoofd y no un adjunct directeur na cabes. Algo cu e mandatario pues ayera a desmenti. “Toch kier bay over na nombra un adjunct directeur, pero pa metanan politico”. Esey nan ta para fuerte contra. “Mester sigui e rapport manera cu mester ta”.

REUNION CU TRAHADONAN

E tempo ey, directora di Dimas Kathy Paskel su splicacion na NoticiaCla.com, enberdad despues cu a atende cu e personal , a informa nan di e decisionnan tuma pa e minister en cuestion, riba e organisacion y tambe cierto nombracion pa DIMAS. Na final, a nota cu e personal no a gusta mucho. “Nan a reacciona na un forma cu no ta satisfecho y a acudi na nan sindicato. No ta conoci ki consecuencia e nombracion awor lo tin pa cu e trahadonan, mirando cu dos luna pasa, nan no tabata nada contento.NOTA: E foto ta di archivo di noticiacla.com dia di clientenan cu mester warda pafo debi cu trahadonan a bay den protesta riba nombracion di Wever na juli ultimo.