Reunion publico riba operatiekamer suspendi te proximo aviso

ORANJESTAD - E reunion publico riba e tema di operatiekamers a caba mes liher cu e la cuminsa. Apenas un ora despues di su inicio, a suspende esaki inicialmente pa un 5 minuut. Pero rapidamente esaki a bira mas largo y finalmente a compronde cu esaki lo keda suspendi te proximo aviso. Informacion cu NoticiaCla.com a logra haya, ta cu a resulta cu ta necesario pa warda un 'feitenonderzoek' pa Raad van Toezicht, cu lo por dura 4 siman. Ta ora cu esaki keda cla, lo por reanuda e reunion aki. Prome cu esey, manera cu NoticiaCla.com a raporta anteriormente caba, e minister en cuestion, Alex Schwengle di salud, a duna su disertacion, sigui pa e disertacion di algun parlamentario. 

COMIENSO DI E REUNION

Esnan cu a comete fayo den e proyecto di hospital, primordialmente e parti di omision di e operatiekamer nobo, mester tuma honor na nan mes y retira. Esey tabata pensamento di minister di salud Alex Schwengle awe mainta den parlamento. A trata e reunion riba e topico di e problema di operatiekamer den parlamento, manera NoticiaCla.com a raporta anteriormente.

ADMITI FAYO

Manera cu e mandatario responsabel pa salud a raporta caba anteriormente, awe mainta a reitera su pensamento. “Ami semper a kere cu ora cu bo kier asumi un posicion di lider, ta nifica cu bo tin un posicion di poder tambe e ora pa decision, y cu momento cu foutnan wordo haci, cu bo ta homber of muher suficiente pa asumi bo responsabilidad. Sea bo ta admiti cu enberdad e decision cu bo a tuma no tabata corecto, cu mester a haci huiswerk miho, pues tene honor na bo mes y retira”. Segun e mandatario, no ta pasa na e pais aki (refiriendo na Aruba), pero tampoco no ta conta na un instancia manera hospital solamente pero otro caminda tambe.

OPOSICION

Te na momento ey, algun miembro di oposicion a hiba palabra. Entre nan lider di fraccion di Democracia Real Andin Bikker cu a considera cu e unico responsabel pa e fayo, ta e minister en cuestion y cu posiblemente e lo ta esun cu tin cu retira. Di parti di fraccion di MEP, e lider di fraccion Evelyn Wever a mustra su indignacion pa cu e tardansa di e reunion aki, y cu e ta hole malo. Colega di partido Dangui Oduber a pidi pa un feitenonderzoek pa trece clarificacion. Despues tabata turno di parlamentario di AVP Mervin Wyatt Ras, cu a pidi pa un suspension di 10 minuut cu finalmente a bira un suspension indefini. 

KEN TA RESPONSABEL

Tabata na comienso di juni cu den un combersacion cu minister di salud Alex Schwengle, e la splica NoticiaCla.com cu e ta na altura ken esnan responsabel ta pa e fayo cu a resulta den gastonan extra halto pa e hospital ‘nobo’. Segun e mandatario, ta raad van bestuur anterior di hospital. Specificamente riba e parti di operatiekamer ‘nobo’. Asina minister di Salud Alex Schwengle a bisa NoticiaCla.com e tempo ey. E ta anticipa cu parlamento lo tuma un decision proximamente riba e asunto, ora cu e presenta dilanti parlamento, cu contestanan riba e pakico no a inclui e sala di operacion pa e hospital nobo. E mandatario prome kier a tende pakico e bestuur di e tempo ey a tuma e decisionnan robes, cu a causa problema pa e proyecto y un aumento considerabel extra, cu no tabata presupuesta. Proximamente e mandatario ta poni pa ta den parlamento atrobe pa duna cuenta riba kico exactamente a pasa.

BFALTA DI INFORMACION

E motibo cu e reunion no a tuma lugar ainda segun e mandatario, ta pasobra e no a haya tur e informacion ainda cu e tabata pidi. E la haya contesta riba e cartanan cu e la manda, pero no tabata loke e tabata kier, pasobra hospital no tabata duna contesta riba preguntanan haci. Como tal tabatin un ‘heen en weer’ di carta, cu a causa tardansa pa e reunion tuma lugar. Awor cu esaki ta cla, e reunion por tuma lugar. Despues di tende loke cu e mandatario tin di bisa riba e asunto, parlamento tin cu tuma su decision kico ta sosode. Entre e posibilidad nan, parlamento por exigi un investigacion den forma di un encuesta parlamentario of un otro forma. Nan por dicidi cu nan mes ta yama e protagonistanan y pidi nan cuenta, of ta haci un fraude onderzoek independiente via forensics, pa wak unda e fout a bay cu e presupuesto di e proyecto, pa cu e operatie kamer.

RAAD VAN BESTUUR RESPONSABEL

Mientrastanto, e Raad van Toezicht di e tempo ey no t'ey mas y como tal no por wordo teni responsabel pa e decisionnan ey. Pero den e caso di e raad van bestuur, tin algun cu ainda ta den e bestuur di e tempo ey. Y nan tin cu bay responsabilisa nan mes pa esaki. E proyecto mes ta canando, aunke no suficientemente lihe segun e mandatario. Si ta p'e, e lo tabata cla 6 luna pasa. E mandatario tabata basta frustra cu e loke a sosode, pasobra e la causa mucho mas placa cu tabata poni, y pa esaki, e ta tene e directiva anterior responsabel.