RvS: Hulanda a actua robez cu dunamento di aanwijzing na Aruba

DEN HAAG – Hulanda no tabata autorisa pa duna Aruba un instruccion (aanwijzing of KB) na 2014. Por lo menos, no riba e manera cu esaki a sosode. Asina Raad van State ta dicta awe den su conseho riba e preguntanan haci pa parlamentonan di Reino Hulandes (cu ta inclui esun di Aruba). Den un sentencia awe. 

MOTIVACION RVS

Den e motivacion di Raad van State, e ta bay basta profundo riba e tema, y ta duna e splicacion completo di ki ora si, y ki ora no por duna e instruccionnan aki. Den e caso di aña pasa, gobernador a haya orden pa investiga e presupuesto prome cu e aproba esaki. Pero Hulanda por haci esaki solamente si e tin como meta, pa destrui (vernietig) e presupuesto. Den e caso ey, tur hende mester a warda te ora cu Raad van State dicidi riba e asunto aki. Loke si conseho di minister di Reino por a duna Aruba, ta un AMvRB, esta un Algemene Maatregel van Rijksbestuur, pasobra pa esey gobernador no tabata necesario pa forma parti.

WELGA DI HAMBER

Tabata aña pasa cu gobierno di Reino a duna Aruba un instruccion, basa riba e incumplimento di e presupuesto su meta, y como tal esaki a causa basta indignacion serca gobierno di Aruba. E indignacion a bay asina leu cu dado momento prome minister di Aruba Mike Eman a bay den welga di hamber pa protesta e hecho aki. A manda pidi Raad van State (via parlamento hulandes) pa un conseho, pero e tempo ey gobierno hulandes no a haya esey necesario. Awor Raad van State ta duna Aruba rason, y ta mustra cu Hulanda a faya den su acto aña pasa. Lesa e conseho completo aki di Raad van State.