SMOA: Minister ta mete den libertad di enseñansa

ORANJESTAD – Usando e palabra di ‘relacion trastorna’ y tambe 'metemento den libertad di enseñansa', Stichting Middelbaar Onderwijs Aruba (SMOA) ta splica e relacion actual entre minister y e fundacion. Den un comunicado, e fundacion ta actualisa e situacion di entrada di alumnonan di mavo pa havo e aña escolar aki. Y den e contexto aki, ta repasa e proceso cu a sigui y ta pasa pa e terminologia ariba menciona. SMOA ta mustra tambe cu, cu tur e empeño di e minister (di enseñansa), apenas 2 mucha extra a logra drenta Colegio e aña escolar aki.

ENTRADA DI ALUMNONAN DI MAVO

E aña aki, segun SMOA, e entrada di alumno di mavo cu a logra pasa nan examen exitosamente pa despues sigui pa di cuater klas di havo a percura pa hopi discusion. Un grupo di trabou cu representacion di tur ‘stakeholders’ a determina cu di un banda e calidad di mavo ta laga di desea y di otro banda tin un preferencia pa un norma di entrada cu ta comparabel cu locual ta usual na Hulanda. Colegio Arubano a uza un norma di entrada un tiki mas severo. Esey a ocasiona un punto di discusion: Colegio tawata dispuesto pa reconsidera su exigencianan pa entrada si lo traha na mehoracion di calidad di mavo.

KIER DI MINISTER Y MAVO

Mientrastanto, SMOA ta sigui splica, minister y e mavonan tawata kier pa Colegio suavisa su exigencianan prome. Minister a pone un fin na e discusion ey cu un medida pa forsa directiva di Colegio pa acepta su norma. E accion di minister al fin y al cabo a resulta den admision di 2 (dos) alumno adicional pa Colegio Arubano. Dushi pa e dos alumnonan ey, pero e prijs tawata halto. Por papia di relacion trastorna, un caso sumario, eventualmente sigui pa un ’caso en extenso’ (bodemprocedure) y metemento den libertad di enseñansa.

MEHORACION CALIDAD PA DRENTA COLEGIO

E siguiente punto riba agenda segun SMOA, lo mester ta mehoracion di calidad di e scolnan cu ta manda alumno pa Colegio. P'esey tin mester di dato estadistico. Esey ta motibo cu SMOA ta publica e datonan di entrada den nan totalidad, tanto pa prome clas CB 1 como pa havo-4. E tabelnan ta mustra e datonan di entrada pa havo-4 di Colegio Arubano y e entrada pa CB1 di tur dos scol di havo na Aruba.

PARTICIPACION DI MINISTER

Minister, segun e comunicado di SMOA, por a participa cu na tur dos scol hunto mas di 200 alumno a haci e traspaso di mavo pa havo. E parti mayor ta scohe pa San Nicolas, na unda ta dispone tambe di un havo superior (clas 4 y 5) cu ta completa den 3 aña. Compara cu Hulanda e entrada ey ta hopi grandi locual ta duna base di preocupacion pa cu e resultadonan cu por spera. Siguramente e scolnan di mavo no ta manda nan alumno riba un base pareu, segun SMOA.