Schwengle: Parti di directiva hospital tin cu tuma retiro!

ORANJESTAD — Durante e reunion parlamentario di diabierna riba hospital, minister encarga Alex Schwengle lo participa cu e kier core cu parti di e directiva actual di hospital. Asina e mandatario ta declara na e vespertino Amigoe. Segun Schwengle, henter e proceso di presupuesto di e camber di operacion nobo cu a wordo gescrap di e plan, tin di haber cu e mal maneho di e directiva anterior di e hospital. Como tal e kier pa esnan responsabel bay. “Esaki ta simplemente escandaloso” e mandatario ta sigui declara na e vespertino.

RETIRA OF PAGA

Segun Schwengle, den e directiva actual tin ainda algun miembro di e directiva anterior. “E ta algo hopi simpel pami. Of esnan responsabel ta paga esaki, of nan ta retira. Mi ta scohe pa e ultimo. Esnan nobo no mester bay. Nan no tabatin nada di haber cu e asunto aki. E otronan si. Nan tin cu bay”. Y esey ta netamente loke e mandatario ta bay exigi diabierna den e reunion.

REUNION DI DIABIERNA

Manera cu NoticiaCla.com a raporta diaranson caba, diabierna awor directiva di hospital Horacio Oduber tin cu duna cuenta na parlamento riba e asunto di fayo den calculacion pa e camber di operacion nobo a costa e proyecto actual hopi mas miyon. E reunion cu a keda posponi for di februari ultimo, porfin a haya su fecha y ta durante e momento aki, cu e reunion tin cu duna claridad kico exactamente a sosode cu a pone cu ‘no a inclui’ den e plan pa un camber di operacion nobo. Mas importante, ken ta esnan cu tin cu responsabilisa nan mes pa esaki.

KEN TA RESPONSABEL

Tabata na comienso di juni cu den un combersacion cu minister di salud Alex Schwengle, e la splica NoticiaCla.com cu e ta na altura ken esnan responsabel ta pa e fayo cu a resulta den gastonan extra halto pa e hospital ‘nobo’. Segun e mandatario, ta raad van bestuur anterior di hospital. Specificamente riba e parti di operatiekamer ‘nobo’. Asina minister di Salud Alex Schwengle a bisa NoticiaCla.com e tempo ey. E ta anticipa cu parlamento lo tuma un decision proximamente riba e asunto, ora cu e presenta dilanti parlamento, cu contestanan riba e pakico no a inclui e sala di operacion pa e hospital nobo. E mandatario prome kier a tende pakico e bestuur di e tempo ey a tuma e decisionnan robes, cu a causa problema pa e proyecto y un aumento considerabel extra, cu no tabata presupuesta. Proximamente e mandatario ta poni pa ta den parlamento atrobe pa duna cuenta riba kico exactamente a pasa.

BFALTA DI INFORMACION

E motibo cu e reunion no a tuma lugar ainda segun e mandatario, ta pasobra e no a haya tur e informacion ainda cu e tabata pidi. E la haya contesta riba e cartanan cu e la manda, pero no tabata loke e tabata kier, pasobra hospital no tabata duna contesta riba preguntanan haci. Como tal tabatin un ‘heen en weer’ di carta, cu a causa tardansa pa e reunion tuma lugar. Awor cu esaki ta cla, e reunion por tuma lugar. Despues di tende loke cu e mandatario tin di bisa riba e asunto, parlamento tin cu tuma su decision kico ta sosode. Entre e posibilidad nan, parlamento por exigi un investigacion den forma di un encuesta parlamentario of un otro forma. Nan por dicidi cu nan mes ta yama e protagonistanan y pidi nan cuenta, of ta haci un fraude onderzoek independiente via forensics, pa wak unda e fout a bay cu e presupuesto di e proyecto, pa cu e operatie kamer.

RAAD VAN BESTUUR RESPONSABEL

Mientrastanto, e Raad van Toezicht di e tempo ey no t'ey mas y como tal no por wordo teni responsabel pa e decisionnan ey. Pero den e caso di e raad van bestuur, tin algun cu ainda ta den e bestuur di e tempo ey. Y nan tin cu bay responsabilisa nan mes pa esaki. E proyecto mes ta canando, aunke no suficientemente lihe segun e mandatario. Si ta p'e, e lo tabata cla 6 luna pasa. E mandatario tabata basta frustra cu e loke a sosode, pasobra e la causa mucho mas placa cu tabata poni, y pa esaki, e ta tene e directiva anterior responsabel.