Wever: Schwengle ta sconde tras di RvB anterior di hospital !

ORANJESTAD – ‘Minister (di salud Alex) Schwengle atrobe ta duna muestra di ta un fracaso door di sconde tras di raad van bestuur anterior!’. Na palabra, ex minister di salud y actual lider di partido UPP, Booshi Wever. Segun e ex mandatario e ta reacciona basa riba un declaracion haci na NoticiaCla, unda cu e mandatario Schwengle a bisa cu diabierna awor Hospital mester bin duna cuenta na Parlamento. Segun Wever, e minister no por papia di tal decision como minister.

ACCION APROPIA

Segun Wever, lo tabata mas apropia, si e minister ta di opinion cu tin hende den e Raad van Bestuur actual cu a faya, pa actua contra esnan responsabel, y despues bin Parlamento pa duna cuenta. Wever ta mustra cu atrobe e minister ta duna muestra di un falta di conocimento di e reglanan, pa no papia mes di su falta di capacidad pa ehecuta un maneho debido pa mehora e cuido medico na Aruba. E ex mandatario ta recorda cu nos constitucion te ainda ta determina cu e minister ta esun cu mester duna cuenta na Parlamento y ningun otro hende, y no manera e kier pretende di por haci, esta laga un no-politico bin den sala di parlamento pa duna cuenta. Esaki ta inaceptabel y intolerabel.

TARDANSA

Remarcabel ta tambe, segun Wever, e hecho cu e minister mes ta declara cu el a tarda asina hopi pasobra tabata tin un bay bin di carta. “Ta ki falta di respet esey ta pa un mandatario? Esaki ta proba cu e minister aki no sa kico e ta haci of ta otro ta bise kico pa haci of laga di haci. Y den varios articulo nos a mustra caba cu e minister aki ta manera un mucha manda di Mike Eman. Y aki un biaha mas esaki a ser comproba” Wever ta sigui bisa.

REUNION PARLAMENTO

Loke mas ta straña Wever, ta e hecho cu den un reunion di Parlamento na februari e aña aki, a suspende un reunion riba e topico di e cambernan di operacion pa dos siman. Y e dia ey e minister en cuestion a bisa cu no por tarda paso no tin tempo pa perde. “Wel, ata nos cu e realidad: ta te despues di 8 luna porfin e minister tin un contesta”. Tempo cu e.o. ABV a pidi pa para e proyecto pa haci un investigacion den henter e procedura di otorgamento na e grupo mafioso di Miami, e minister a hera come e presidente di ABV bibo. “Pero awor pa motibo di su mediocridad y falta di determinacion, e asunto di camber di operacion a tarda mas di 8 luna. Y pa colmo, en bez di carga su propio responsabilidad, e kier bin schuif esaki den scochi di otro. Y pa colmo sin menciona nomber. E pregunta grandi ta dicon? Miedo di kico e tin? “ Wever ta puntra.

CARTANAN

Segun Wever, si e cartanan cu e tin den su poder cu segun e, ta mustra kendenan ta e culpabel, dicon no ta menciona nomber? “Of mihor ainda, dicon no ta publica e cartanan aki? Y sigur sigur den e cartanan aki ta menciona nombernan di esnan cu tabata den e Raad van Toezicht y den e Raad van Bestuur. Ta ki miedo tin di publica e nombernan? Ta na cua miembronan e ta referi? Boesten, de Kool of Falconi? Ta pakico ta defende nan? Pueblo mester sa ta kendenan ta esnan culpabel di esaki. “ Wever ta sigui puntra. Of e miembronan aki, for di prome cu a firma e contract cu e mafiosonan di Miami, a notifica tur e stakeholdernan di e situacion? Lesa e articulo completo di Wever aki.