Apertura oficial di Joe Laveist Sport Park fin di november cu “All Star Game”

ORANJESTAD - E siman aki Aruba Sport Unie (ASU) a anuncia reapertura di Joe Laveist Sport Park dianan 27, 28 y 29 di november proximo cu diferente actividad y evento. Dia 27 di november e apertura oficial di e facilidadnan ta tuma luga. E siguiente dos dianan lo ta yena cu diferente evento, incluyendo un “All Star Game” di softball y demostracion di deporte di parti di diferente federacion, incluyendo beach volleyball, LIFIDA, baseball, futbol, domino, basketball y boxeo.

ALL STAR GAME

E evento cu sigur lo tin un impacto hopi grandi ta e All Star Game, pa cual ta invitando streanan di baseball di Major League “MLB” pa hunga un wega amistoso contra un team di hobennan Arubano cu ta destacando den e deporte.

DIJKHOFF

Rhadames Dijkhoff, kende a lanta na San Nicolas y den bisindario di e Sportpark a hunga como mucha hopi biaha riba e veld na Joe Laveist Sport Park, ta e deportista cu ta encarga pa organisa e All Star Game. Dijkhoff a bisa cu e no por menciona nombernan di e hungadonan cu nan tin contacto cune ainda; asina mes el a laga e nomber Vladimir Guerrero “slip”, añadiendo cu no a yega na un compromiso sigur ainda, pero cu e negociacionnan cu e hungado legendario aki ta hopi avansa caba.

ATLETA INTERNACIONAL

Tin hopi interes di parti di e atletanan internacional y negociacionnan ta den bon rumbo, Dijkhoff a comenta, añadiendo cu den e proximo luna lo tin un otro conferencia di prensa pa anuncia esunnan cu a confirma cu nan ta bay ta na Aruba pa e All Star Game.

GERRY FRANCA

Gerry Franca, kende ta Presidente di Aruba Sport Unie (ASU), e organisacion cu ta doño di Joe Laveist Sport Park, a expresa cu nan ta hopi contento cu e esfuersonan di gobierno y e compromiso pa logra renoba e facilidadnan completamente, añadiendo mas facilidad cu nunca antes tabatin. Franca a splica cu Joe Laveist a conoce su reapertura na aña 1997 y despues tabatin problemanan di mantencion cu mester a wordo adresa, pero pa cual ASU no tabatin e recursonan necesario.

RENOBA

Actualmente, Joe Laveist Sport Park tin luznan nobo, tribuna y daknan di tribuna nobo, un score board moderno cu ta traha cu “remote control”, facilidadnan pa reporteronan transmiti wega, un veld completamente renoba y un “zandbak” pa haci e deportenan di beach, manera beach volleyball.

E di tres fase di e renobacion y expansion di Joe Laveist Sport Park ta encera e construccion di dos sala grandi pa e deportenan cu ta wordo eherce paden (“indoor sports facilities”), manera taekwondo, basketball, karate, boxing, etc. Joe Laveist Sport Park ta casi cla pa ricibi pueblo di Aruba, ASU ta entusiasma cu e aporte cu gobierno a haci na e facilidadnan y ta sigui padilanti motivando tur e diferente federacionnan pa haci uzo di e facilidadnan bunita renoba.