Gruponan Hubenil ta uni forza pa Koningin Wilhelmina Fonds Aruba

ORANJESTAD - Un grupo di organisacion y clubnan hubenil a uni pa un bon causa, pa yuda den e benta di rifa di Koningin Wilhelmina Fonds Aruba (KWF). Esaki lo tuma lugar diasabra dia 26 di september proximo na diferente punto rond di Aruba. E diferente organisacionnan cu ta participa den e accion di benta di rifa ta Rotaract Club, Key Club Colegio Arubano, Cirkle K EPI y Cirkle K Universidad di Aruba y Poder di Hubentud. Tambe otro role modelnan manera Miss Teen Aruba International lo ta activo den e proyecto aki.

PREMIONAN

E rifa di KWF tin hopi premio atractivo pa yuda recauda fondo pa e fundacion. E premionan ta inclui entre otro un auto KIA Rio Hatchback, crucero den Caribe pa 2 persona cortesia di Maduro Travel, 2 tickets pa Amsterdam-Aruba-Amsterdam pa 2 persona cortesia di KLM, Gift certificate 1000 florin cortesia di Caribbean Mercantile Bank Aruba, Gift certificate 1000 florin cortesia di Boolchands, Gift certificate 1000 florin cortesia di SETAR, Gift certificate 1000 florin cortesia di Unicon, Gift certificate 1000 florin cortesia di Super Food,1 pasashi pa Medellin, Colombia cortesia di Insel Air y 1 pasashi pa Puerto Rico cortesia di Insel Air. Prijs pa rifa ta: 25 florin pa un ticket y 500 florin pa buki. E rifa lo tuma lugar dia 1 di november 2015.

CANCER

Cancer ta un enfermedad cu awendia ta ataca hende jong of di edad, muchanan muher y homber den tur famia y sin discriminacion. E ta un realidad cruel no solamente pa e pashent, pero tambe su famia y otro hendenan stima. Mundialmente e cantidad di hende cu cancer ta aumenta. Na Aruba tambe nos conoce hopi caso di cancer. Durante tur e añanan di existencia Koningin Wilhelmina Fonds Aruba a experiencia e aumento den gastonan extra cu e enfermedad y tratamento di esaki. E cuido di un pashent di cancer ta hopi halto y ora yega asina leu pa e pashent e fundacion ta cubri esaki completo. E gasto di mas grandi ta e cuido di pashent na cas. Un cuido na cas ta costa bastante pero si e pashent di cancer acerca e fundacion aki pa motibo di no por cubri esakinan e ta haya e ayudo gratis. Ademas di articulonan material manera cama, protese etc, ta percura pa guia pa e famia, un guia pa e pashent mes y e cuido na cas completamente gratis. Tambe KWF ta cubri transporte di cas pa oncologie, di oncologie pa cas bek pa dokter bay y bin. Ademas di cubri gastonan pa e pashentnan cu mester di esaki KWF ta traha den campañanan di conscientisacion manera a anuncia recientemente, manera come saludabel, move mas, no huma, haci checkup regular etc. Pa unicamente 25 florin, bo ta contribui na KWF y tin e chens di gana premionan sumamente atractivo. Por tuma contacto via number di telefon di Koningin Wilhelmina Fonds na 582-0412 entre 9or di mainta y 12or di merdia for di dialuna te cu diabierna of via Facebook page; Koningin Wilhelmina Fonds Aruba. Ban uni pa sigui e lucha contra cancer!