Tarifa di parkeermeter reduci despues di dos siman

ORANJESTAD – Usuarionan di parkeermeter lo conoce un reduccion di tarifa pa parkeer. Asina e compania ta participa apenas dos siman di a introduci parkeermeter den centro di Oranjestad. Segun e compania den un comunicado, ta splica cu ‘e acogida a resulta mas di locual nan a premira den nan plan di negoshi’. Como tal a opta pa ‘revisa e tarifanan y haci nan ainda mas social’. Aki ta papia di esnan cu ta haci compras, diligencia of ta traha den e areanan en cuestion.

AUMENTA ORA Y PAGA MENOS

Entre e cambionan, Aruparking ta mustra cu awor a introduci un tarifa adicional pa esunnan cu no mester parkeer pa largo, cu ta pa chauffeurnan cu mester haci un diligencia masha lihe. E grupo ey no mester paga 2 florin mas pa 1 ora, sino lo paga solamente 1 florin y por staciona pa 30 minuut. Pero e cambio mas grandi ta e tarifa di 2 florin pa 1 ora di parkeer, cu awor a bira 2 florin pa 90 minuut. Y pa e grupo cu a pasa 90 minuut, lo tin un tarifa di 50 cent pa 15 minuut di parkeer na e mesun espacio.

TARIFA MENSUAL

Pa loke ta e tarifa mensual, esaki tambe a conoce cambio. Si prome tabata 75 florin pa luna, awor a baha cu 20%. Pues, empleadonan cu ta paga pa staciona nan auto henter dia den e vaknan color geel lo paga solamente 60 florin pa luna, cu ta un reduccion substancial di 15 florin. E tarifa nobo ta debi na e hecho cu a logra crea mas parkeerplaats y a haya un acogida mas grandi cu a anticipa. AruParking a enfatisa cu den caso di habitantenan cu ta biba den e region cu mester paga pa parkeer, awor lo por staciona nan prome auto gratis!

KLEM

Den caso cu klem bo auto, dor cu no a paga pa parkeer of tempo a surpasa e limite, lo mester paga 75 florin. Antes a stipula e multa na 75 florin pa ora y despues di 3 ora, cu e suma a alcansa 225 florin, lo takel e auto hiba Arubus y cobra Afl. 150 florin adicional. Di acuerdo cu e cambio haci, awor lo aplica e tarifa di klem na 75 florin y lo no sigui aument'e segun oranan ta transcuri. Locual si lo bin acerca ta gastonan di takelwagen di 150 florin, den caso cu transcuri 3 ora di tempo.

TRANKILIDAD

Segun e compania, AruParking, ta convenci cu e cambionan aki lo atrae mas automobilista pa yega den tur trankilidad y confiansa pa parkeer nan auto mas cerca di nan destinacion. Pa paga por hinca monedanan di florin Arubiano of dollar Mericano den e mashin. Pa evita cu ta cana cu placa efectivo, ta conseha pa cumpra un smartcard, cu cual por haci pago mas facil y conviniente.