Trahadonan di Renaissance cu accion di firma contra parkeermeter

ORANJESTAD – Un total di entre 500 pa 550 trahado, -di un total di 750-, di Renaissance Hotel a participa den un accion di firma contra e situacion di parkeer cu a surgi cu e entrada di e ‘parkeermeter’. Despues di un siman y mei di operacion, ta bisto cu e trahadonan no ta nada contento cu e situacion, y nan a dicidi di vocifera esey. Gerente general di Renaissance, Paul Gielen a confirma e accion na NoticiaCla.com y a mustra cu nan ta sostene como gerencia, e accion aki. “E ta duro pa nan, e placa, e ora di parkeer, inseguridad” Gielen a bisa.

SOSTEN TOTAL

Mientras cu e ta confirma e cifra di esnan cu a firma, e ta bisa cu esey no ta nifica necesariamente cu e resto di e 750 trahadonan no ta sostene e accion. Gielen ta mustra cu mientras cu no ta gerencia a inicia e proceso aki (e ta lidera pa dos trahado cu a organisa e actividad di firma), gerencia ta sostene e accion y tin full comprension pa e situacion cu a surgi. Mientrastanto NoticiaCla.com a compronde cu e intencion tabata pa bay parlamento cu e lista di firma, y tambe a compronde cu minister di transporte Otmar Oduber lo atende cu nan. No ta confirma si esey ta awe mes, of riba un fecha despues.

CARTA DI TRAHADONAN

Den un carta dirigi pa e minister responsabel pa parkeermeter (Otmar Oduber), e trahadonan ta pidi pa consideracion pa nan y pa trece cambionan den e concepto. Nan ta cita varios motibo pa cual nan no ta contento actualmente cu e situacion, pero mes momento ta mustra cu nan no ta contra e proyecto total. Solamente cu mester adapta e proyecto di tal forma cu e ta beneficia e grupo di trahadonan cu ta wordo afecta. Entre e puntonan di preocupacion, ta e seguridad cu no tin pa un grupo cu no por a haya permiso di parkeer serca di e lugar di trabou. For di momento cu nan a keda confronta cu e parkeermeter, hopi trahado a haya nan mes den varios situacion fastioso caba. Den e carta pa e mandatario, nan ta bin cu algun keho specifico, pero tambe sugerencia con por remedia e situacion pa tur hende por keda contento. A mustra cu nan ta representa 550 trahado, pero ta conta cu sosten di tur 750, y tambe cu gerencia cu a sostene y apoya e trahadonan pa nan por a tene e accion di firma y entrega esaki na e mandatario. Lesa e carta aki. 

 MENASA DI ACCION

Tabata un siman pasa caba ora cu un grupo di trahado di Renaissance marketplace, casino y hotel a mustra na NoticiaCla.com cu nan ta disgusta cu e situacion di parkeer y no ta descarta cu un posibel accion por escala for di e asunto aki. Segun e trahadonan a splica NoticiaCla.com, nan ta disgusta cu nan a wordo forza pa parkeer pafo di e parkinglot regular, ‘pasobra e la bira ‘guest only’. Nan ta sinti cu compania no ta atendiendo esaki corecto asabiendas cu e parkinglot patras, ta bashi mainta.

RABIA

“E trahadornan di Renaissance Market Place y Casino y Renaissance hotel ta hopi rabia cu management. Trahadornan kiermen cu nan ta traha duro pa hiba compania dilanti y pa compania trata nan asina no ta fair” nan a bisa. E trahadornan ta sinti cu compania kier spaar, pero no ta pensa riba e trahadornan. Un di e kehonan ta cu nan tin cu parkeer mas leu, y ta insigur pa laga e auto sin proteccion.

SITUACION SEGUN GERENCIA

“Tur cliente di (Renaissance) Marketplace y Mall por parkeer libramente”. Asina e gerente general di e propiedad, Paul Gielen a confirma na NoticiaCla.com diamars mainta. El a reacciona riba e critica cu a bin for di dialuna ora cu e propiedad a sera e acceso regular na e lugar di parkeer, pa e parti patras di e Mall y hotel.

RASONAMENTO PA PARKEER

Segun Gielen, loke cu nan a haci ta cu tur empleado, esta di e hotel, e mall y e doñonan di tiendanan, mester haci uso di e espacionan di parkeer publico, pa sigura cu nan tin sufiente espacio pa nan clientenan (huesped di hotel y tambe di e mall). A remarca cu berdad ta dificil pa distingui ken ta huesped y ken no, y ken ta un cliente of un persona cu simplemente kier parkeer eynan. Pa awor, e compania lo acepta bo comentario y kere cu bo lo ta bisa do e berdad di bo intencion. “Den futuro, nos lo instala un sistema automatisa” Gielen a sigui bisa, pero no a bisa kico exactamente esey lo ensera.

PARKEO DI TURISTA

Den combersacion cu e vocero di Arubus/Aruparking Sanin Daou, e la confirma tambe cu enberdad mirando cu no tur espacio 'asigna' pa esnan cu tin permiso pa parkeer na nan lugarnan ey ta marca cu e strepi geel, a surgi algun caso unda cu turistanan a parkeer riba e sitio ey. A resolve e problema den forma di laga esnan parkeer den e zona sin problema, pendiente cu awe na final di dia, e liñanan geel tur lo keda cla awe si. A takel algun auto tambe y asina tin varios storia cu por relata den curso di dia. 

PARKEO NA HOTEL

E situacion cu a surgi ta cu entrante ayera, no por tabatin aceso sin mas na e lugar di parkeer di Renaissance. Como tal a cuminsa usa e boom pa frenta tur trafico, y controla kico tur nan ta bin haci. Esnan na e sitio y den operacion, a splica NoticiaCla.com cu e lugar patras di parkeer no ta sera, pero mas bien ta disponibel pa clientenan y turistanan di hotel. Si bo ta sea un turista residente di e hotel y of ta bay usa e facilidad di e propiedad, bo por drenta y parkeer.