Innovacion y Sostenibilidad ta uni cu Cas di Cultura durante TEDx Aruba 2015

ORANJESTAD – Diaranson mainta organisadonan di e evento educativo y inspirativo TEDx Aruba 2015 a reuni cu prensa na nan sede nobo, Cas di Cultura. Teniendo na cuenta aspectonan logistico y meteorologico, a tuma e decision pa cambia for di e luga original cu tabata edificio di ex John F. Kennedy School. E cambio di luga a keda anuncia hunto cu dos orador nobo, un local y un di exterior ademas di e evento cu ta contribui na comunidad y facilidadnan pa medionan di comunicacion.

Elton Arends, Presidente di e Fundacion TEDx Aruba a duna di conoce cu nan tin como prioridad pa e participantenan di e evento tin un experiencia productivo y agradabel, como tal, a tuma decision pa djis move un tiki y bay otro banda di caminda, na Cas di Cultura. “Tur hende conoce Cas di Cultura y sa cu lo ta un bon luga pa tene e evento aki,” Arends a splica.

E programa ta wordo amplia pa asina duna e publico un contenido ainda mas grandi. Tin dos orador adicional, e prome ta Roel van Rijswijk cu lo presenta e tema ‘The World is an Island.’ E ultimo orador pa drenta e programa di TEDx Aruba 2015 ta ir. Raffy Kock, un diseñador y arkitecto visionario cu lo trata e tema ‘Happy Life.’ Arends a comenta cu ambos ta figuranan masha interesante y sigur nan ta hopi emociona di por conta cu nan participacion y tin gran curiosidad pa wak nan presentacion.

Pa loke ta e segmento di Entretenimento den TEDx Aruba, esaki a keda den man di e conoci productor y musico local, Michael Lampe. Na e conferencia di prensa el a expresa cu e ta sumamente contento di a haya e invitacion pa ta parti di un evento asina aki manera TEDx. “Mi mes sigur ta un fan di TEDx pa hopi aña caba y mi ta kere cu e ta algo sumamente grandi y bunita pa Aruba.” Su banda Datapanik lo t'ey integra den e programa di oradornan.

Lampe a hala atencion di esnan presente sigurando cu loke ta bin cune durante e evento di proximo siman ta algo cu ningun hende kier perde. Su meta ta pa e pasa pa historia como un evento sumamente grandi. Ta conta cu participacion di Mike Huntelen kende ta un trompetista Hulandes residencia na Colombia y nomina pa Latin Grammy Awards. Huntelen ta bay duna un presentacion di su caminda pa exito, pero tambe haci un demostracion.

Por ultimo, Esther Pezij-Broeksema, como Relacionista Publico di TEDx Aruba 2015 a duna di conoce cu a inclui den e programa di e dia aki dos area sumamente atractivo. E prome ta un Innovation Lab caminda companianan ta presenta productonan innovativo. E di dos ta un ‘Silent Auction’ basa riba resultado di un proyecto educativo. Studiantenan di scolnan hunto cu nan docente di arte a colecta materialnan cu cual a diseña y construi mueblenan. E fondonan recauda dor di e evento lo bay pa un instancia cu ta keda anuncia e anochi mes.