CAFT: Duda cu gobierno di Aruba ta logra baha deficit manera palabra

ORANJESTAD – College Aruba Financieel Toezicht (CAFT) ta considera cu mientras cu gobierno di Aruba a realisa basta pa yuda drecha e situacion financiero, un biaha mas ta mira cu e no ta suficiente. De hecho, si no tuma medida extra, e no ta mira cu Aruba por logra e meta pa reduci e deficit manera palabra. Asina CAFT ta skibi den su raportahe di e di dos cuartal di progreso di ehecucion di presupuesto 2015. Y hunto cune, un biaha mas CAFT ta laga 4 recomendacion atras pa gobierno cumpli cune pa e por logra toch sali for di e problemanan financiero.

FALTA MAS MEDIDA

Segun CAFT, mientras cu a realisa 48% di e presupuesto, pero pa loke ta e parti di medidanan di consolidacion, esaki ta cana atras cu 47%. Loke tambe CAFT ta mustra, ta cu nan ta preocupa cu e falta den tuma medida riba tereno di personal. Mas specifico, den e categoria di ‘reduci contractantenan cu mitar, y e reforma di e areglo di pensioen di AFPA. Como tal CAFT ta mira cu si e crecemento di e gastonan no wordo reduci lihe, e deficit di 3.7% pa PBD na 2015 lo no ta alcansabel’.

RECOMENDACIONAN DI CAFT

Entre e recomendacionnan cu CAFT ta sugeri, tin ‘preparacion di medidanan cu ta reduci gasto y aumenta entrada pa evita cualkier sorpresa negativo cu por afecta e deficit di 3.7%. Si no a cuminsa un trayecto pa reduci e crecemento di gasto structural riba termino corto, esey tin cu tuma lugar mas liher cu ta posibel. “Usa e ayudo tecnico di Hulanda pa agilisa e proceso aki”. Percura pa e preparacionnan necesario keda cla (politico y huridico) pa asina e medidanan pa aumenta entrada manera aumento di BAZV of BBO, por wordo introduci sin tardansa. Usa e resultadonan di un auto-asesoramento pa di forma mas eficiente y efectivo, por conduci e mehoracion necesario pa por drecha e maneho financiero. Usa e asistencia tecnico (di Hulanda) pa evita perdida di tempo. Mas di e raport den e proximo oranan. Por lesa e rapport completo aki.