Facebook dispuesto pa inclui e 'duim' negativo awor

PALO ALTO - E cambio mas 'revolucionario' riba e red social mas grandi di mundo ta na caminda 'porfin'. E 'dislike button' of duim of dede pulgar (na spaño) abou enbes di ariba ta loke ta proximo pa e creador di Facebook, esta Mark Zuckerberg. Mientras cu e ta zona algo inferior, y no noticioso, e noticia aki a haya asina hopi atencion ora cu e la keda anuncia, mundialmente cu e la bira un di e noticianan mas grandi. Simplemente pasobra e ta facilita e usario di Facebook cu un alternativa mas real pa identifica nan mes cu un storia of un 'posting'. E asina yama 'rechaso' di un noticia cu antes por a reacciona solamente cu un 'duim' ariba cu normalmente ta sinonimo cu algo positivo. Den caso di un posting di algo tragico, manera anuncio di un morto, of algo otro tristo of di desaprobacion, mester a 'like' of pone e duim ariba, siendo cu esey no necesariamente tabata e intencion. 

POSIBILIDADNAN AMPLIO

Cu e duim abou awor, e ta duna mas usuario e posibilidad pa 'interacta' riba facebook. Hopi hende (segun investigacion di FACEBOOK), no tabata interacta mas pasobra nan no kier a duna e 'impresion' cu nan tabata 'di acuerdo' cu cierto posting. Y nan tabata bandona esaki. Aworaki, cu e duim abou, nan por sigui interacta y mustra nan pensamento real. Motibo inicial pa no inclui e duim aki, segun Zuckerberg, ta cu nan no kier a crea un ambiente hostil di hende contra otro, cu no ta e meta di e red social. Pero tempo a mustra cu nan tabata ekiboca. No ta conoci ki dia e duim 'nobo' lo keda presenta aunke ta premira cu esaki lo ta mas pronto cu a kere.