Piscadornan arubiano rescata, lo bolbe Aruba for di Cartagena

ORANJESTAD – E cuater piscadornan arubiano cu tabata perdi, ta na caminda pa Cartagena Colombia, y for di eynan, lo bolbe Aruba. Despues cu nan a wordo rescata ayera, e barco 'Aragoborg’ a piki nan y lo baha nan na e destinacion di e barco, cu ta Cartagena. Asina guarda costa di Caribe Hulandes a raporta. E barco di e piscadornan esta ‘Kathy’ no tabata posibel pa wordo getowed y a keda drief den laman grandi.

E CASO

Tabata dialuna ultimo (14 september) cu e RCC (Reddings en Coordinatie Centrum) di guarda costa di Caribe a ricibi un melding di e bapor cu a perde cu cuater piscadornan. E famia di e piscadonan a bati alarma dialuna ora cu e piscadornan (cu a sali pisca diasabra) no a bolbe mas. Segun informacion, e piscadornan lo a bay pisca parti oost di Aruba, pero no a bolbe dialuna merdia. Mesora guarda costa a manda nan unidad for di Aruba den e area, pero a para e buskeda ora cu anochi a cai. Diamars esaki a continua y despues di 4 ora di buskeda, e avion dash-8 a localisa nan 100 miya west di Aruba. E motor a daña y nan a drief bay leu. A pidi e barco di carga Aragonborg pa asistencia, cual nan a duna tambe. A mobilisa pa e lugar di contacto y a piki e piscadornan cu tabata den bon estado. Pues ta wardando pa e piscadornan bolbe awor for di Cartagena Colombia. No ta conoci ki dia nan lo bolbe Aruba. NOTA: Foto di e barco Kathy, ta cortesia di guarda costa.