Gremionan desapunta cu resultado dialogo riba seguridad

ORANJESTAD – “Ta berdad, gremionan no a keda contento. Gremionan a keda decepciona” ta palabra di e.o. presidente di sindicato FTA, Hubert Dirksz como reaccion na NoticiaCla.com riba e dialogo riba seguridad dialuna atardi. Segun Dirksz, e reunion tabata un presentacion un poco manera un show mescos cu tur e otro dialogonan. “Na prome lugar nos no a pidi pa un dialogo, sino nos a acorda cu Premier cu e lo haci un inventario y bin cu e realidad cu nos por midi y basa riba esey tuma decision kico ta bai haci pa frena e criminalidad principalmente den e area turistico” Dirksz a bisa.

BEK DEN TEMPO

Pero segun e lider sindical, prome lugar promer minister a bai bek riba e protocol firma entre gremionan na Augustus 2013 cu den realidad no a wordo evalua ni midi den realidad kico gobierno a haci of ta haciendo unda por midi e resultado. “Loke nos a pidi p'e ta pa nos wak kico nan ta wordo haci of no, kico falta y ki medida por tuma awor di biaha riba termino corto. Esey no a tuma lugar y loke gobierno a presenta tabata hopi general cu a decepciona tur hende” Dirksz a bisa. Nan (gremionan) ta kere cu prome minister mester bin cu datonan cla y e prioridadnan basa riba e datonan, pa e ora discuti riba e medidanan, kico mester pasa, ken ta haci esaki, con e ta wordo maneha y evalua y di unda e placa ta bin. “Lamentablemente gremionan no a haya esey. Gremionan lo bai evalua esaki y lo contesta gobierno. Pero Gremionan no a keda contento pasobra no tabata e palabracion y esaki un biaha mas no ta yuda pa un relacion serio cu gobierno”.

PLANNAN RIBA TERMINO

“Na cierto momento por bisa cu e plannan riba termino largo pa loke ta seguridad den enseñansa ta bon, pero ademas cu nos no a pidi esey, e no por wordo bon midi” Dirksz a sigui bisa. Mientrastanto den realidad, cosnan cu no ta bon no ta hayando atencion. “Nos ta verwacht cu gobierno ta habri y no sconde e problema y ban habri pa atende cu esaki pa nos logra pa mantene un Aruba mas sigur, pasobra cada un crimen ta di mas” Dirksz a finalisa bisando. NoticiaCla.com a compronde di Kvk cu nan pensamento no ta desvia mucho di esun di FTA y cu dentro di poco, nan tambe lo bin cu nan reaccion. NOTA. Foto cortesia ministerio di husticia.