“El Pollo” Carvajal traslada pa KIA

ORANJESTAD – NoticiaCla tin confirmacion cu autoridad local a traslada e ex general venezolano Hugo “El Pollo” diabierna anochi pa KIA, unda cu e ta wordo cuida den un seccion special. NoticiaCla tin confirmacion tambe cu e unico departamento cu tin contacto cu e ex general, ta e departamento di K9 di KIA. Nan ta completamente responsabel pe, cu ta ensera su cuminda, lague ‘lucht’, su bishitanan y tur otro pasonan di e ex general.

For di momento cu e ex general su detencion a wordo prolonga diabierna atardi, , a cuminsa preparacion pa su traslado pa e instituto correctional na Santa Patia na San Nicolas. Y den oranan di anochi, e traslado a sosode bou di control estricto.

Tin informacion tambe cu lo ta preparando pa eventual ‘intento’ di liberacion di e ex general, estilo pelicula. Esta cu esaki lo por sosode pa medio di helicopter unda cu lo por percura pa un tipo di ‘escape’ militar cu ayudo di militarnan venezolano. Esaki ta un scenario cu ta prepara pe en caso e sosode. Mirando e cargonan cu tin contra e ex general (lesa e cargonan aki) , ta pone cu tin hopi wowo riba su persona, y tambe e interes di prensa internacional a demostra esey for di momento di su captura diaranson. Ta considera e persona aki uno sumamente poderoso, cu hopi informacion valioso cu Merca mester pa por bringa cierto cartelnan di droga na Venezuela, Colombia y Mexico.