Mencion explicito na Caribe Hulandes durante discurso Rey

DEN HAAG – Contrario na  ultimo añanan, durante e discurso anual di Rey Willem Alexander na apertura di e aña parlamentario, unda cu apenas un of dos frase ta wordo dedica na e parti caribense di Reino Hulandes, esey tabata diferente e biaha aki.  E biaha aki a haci mencion specifico riba Caribe y e forma con lo actua si ta sinti cu cos 'no ta bayendo bon'. “Hunto cu e partinan caribense di Reino, Hulanda ta sigui traha na un bon futuro”, e parti ta cuminsa. "Gobierno tin un tarea di ta ehempel ora cu ta trata ehecucion di comparticion di balor. E integriad di gobierno no por ta den discusion. Gobierno ta pone regla y ta sigura esaki pa garantisa orden publico y seguridad. Unda cu mundo baho y otro mundonan mescla, esaki ta wordo atendi. Aki lo pone extra placa disponibel". Aki ta atende entre otro e situacion na St Maarten y otro camindanan den Reino Hulandes. Tambe ora cu otro islanan no traha manera cu mester. 

DISCURSO ANUAL

Manera ta conoci, e di tres diamars di luna di september, (contrario na nos cu ta ‘celebra’ esaki e di dos diamars di luna di september), gobierno di Hulanda ta tene nan apertura di aña parlamentario. Durante e momento ey, SM Rey Willem Alexander ta lesa e discurso prepara pa e gabinete na mando, y ta duna un indicacion di kico a pasa, ta pasando y kico por spera.

PUNTONAN CU A RESALTA

Entre e puntonan cu a resalta, ta cu Hulanda ta miho para cu prome, aunke ainda no a sali for di e situacion financiero malo cu e tabata. Ainda e desempleo ta mucho halto, y tin cu drecha esey. Di otro banda economia ta drechando debi na e.o. empuhe di gobierno den e parti financiero, y cu a pone cu comerciantenan a cuminsa inverti y draai miho.

DEPENDENCIA DI GAS

Loke ta interesante ta e hecho cu Hulanda ta raporta e parti di reduccion riba dependencia di gas, pa motibonan obvio. Posibel temblor y otro factornan di tera. Esey ta nifica cu mester ta mas creativo y aki ta unda cu nos region (aunke esey no ta wordo bisa den e discurso) por hunga un rol importante si descubri gas den nos awanan teritorial. Lesa aki e discurso integralmente.