CN: Nada concreto ainda riba seguridad di scolnan

ORANJESTAD – Riba 14 di april ultimo un grupo di hoben ta bati e cabesante di Colegio Santa Filomena na San Nicolas riba su cabez. E acto aki ta conduci na accion den enseñansa pa bin cu mas seguridad pa scolnan. Gobierno a forma un comision y ta priminti accion lihe. Pero despues di 5 luna, ta keto atrobe. Asina Sharina Henriquez ta raporta den un articulo pa partner di NoticiaCla.com, esta Caribisch Netwerk awe.

PIOR MOMENTO DI CARERA

Segun e articulo, e cabesante en cuestion, Marion Lopez, no ta duna mucho informacion debi cu tin un investigacion policial andando. Pero e ta considera e acto aki como e pior di su carera di 34 aña. E ta papia riba e cantidad di incidente violento na scolnan, cu ta ‘florece’ y adultonan cu ta pone mucha comete nan crimennan, asabiendas cu mucha no ta wordo castiga severamente.

SOSTEN MASIVO

Banda di esey, directiva di scol, gobierno y politica ta haci algo te ora cu scolnan mes actua via prensa, e cabesante ta pensa. Despues di e atake contra dje, tabatin accion masivo como sosten pero mas pa protesta contra e falta di solucion contra inseguridad riba scolnan. Lopez ta haya cu e sosten duna tabata agradabel. Ademas, su scol tin 24 ora vigilancia awor. Pero e ta puntra pakico ta actua despues cu algo a sosode caba.

PROTOCOL SCOL SIGUR

Un di e solucionnan cu e comision di gobierno ta trahando ariba, ta e constelacion di un protocol di comportacion. Lopez no ta mira e esencia di esey. Tin algo manera ‘scol sigur’ cu tin un protocol caba. Esey a keda instala 4 aña pasa y ta firma pa gobierno, polis, ministerio publico, fundacionnan y scolnan pa ataca e inseguridad na scolnan. Sinembargo, e ehecucion di esaki, nunca a tuma lugar.

Autor: Sharina Henriquez pa Caribisch Netwerk. Foto: Sharina Henriquez