Gobierno di Reino tin problema cu parti di amienda di ley CAFT

ORANJESTAD – Mientras cu e ta elogia gobierno di Aruba pa su forma exitoso di cumplimento cu un di e palabracionnan mas esencial di 2 di mei ultimo, minister hulandes Ronald Plasterk (na nomber di Reino Hulandes) ta mustra Aruba cu tin problema cu e amienda cu e partido AVP a entrega y pasa durante e tratamento di e ley CAFT. Den un carta, cu NoticiaCla.com a tuma nota di dje, dirigi na prome minister di Aruba, e mandatario ta preocupa cu e parti specifico di eligimento di miembronan di CAFT. 

MIEMBRONAN COMISION CAFT

Den e carta, e mandatario ta papia specificamente di e articulo 3, inciso 1, parti d, cu ta atende cu personanan cu a aparece riba un lista politico den pasado den Reino Hulandes, no por ta parti di e comision CAFT. “Esaki por tin pa motibonan practico y contenido, limitacion pa candidatura di miembronan di Aruba y Hulanda”, Plasterk ta bisa. Mientras cu Plasterk ta bisa cu lo bay investiga si di parti di Hulanda, ta cumpli cu e parti aki, e kier pa Aruba haci mescos. 

ADAPTA LEY

Dado caso resulta sinembargo cu enberdad pa motibo di e criteria aki, e candidatonan no ta cumpliendo, ta urgi Aruba pa cambia e ley aki di tal forma cu e miembronan actual keda forma parti di e comision. Esaki pasobra Hulanda kier mantene e candidatonan manera cu nan ta aworaki. Y dado caso resulta aworaki cu ningun candidato ta den conflicto, toch kier haci e cambio den futuro tambe. 

PRESTAMO

Fuera di esey, e mandatario ta referi na e prestamo cu Aruba a haci pafo di Reino, y tambe cu a haci palabracion pa cu e ayudo tecnico pa nos isla. NOTA: e foto ta di archivo di NoticiaCla.com durante e SAIL ARUBA 2015 ora cu minister hulandes Ronald Plasterk y prome minister di Aruba Mike Eman tabata den discusion riba e tema aki.