Koenders: Mas di 7 mil kilo di droga gara den Caribe Hulandes

DEN HAAG – Mientras cu no tin cifranan di confiansa di e cantidad di droga captura y e origen via laman Caribe, tin mas di 7.000 kilo di droga captura te cu augustus 2015 entre Venezuela y Caribe Hulandes (incluyendo Aruba y Corsou). Asina minister hulandes Bert Koenders a contesta parlamentarionan hulandes Ten Broeke y Bosman di VVD awe. E ocacion di e contesta tabata e serie di 3 pregunta cu e parlamentarionan a haci recientemente basa riba un intercepcion di droga cerca di Aruba y Corsou. Lesa e carta di contesta aki.

RAPORTAHE DI CAPTURA DI DROGA

Tabata na juli ultimo cu prensa venezolano a raporta un captura substancial di droga ‘cerca di Aruba’. Ora cu NoticiaCla.com a averigua e tempo ey, autoridad di Aruba no por a confirma nada. A resulta pasobra enberdad tabatin un captura, pero no serca Aruba sino net pafo di awa teritorial di Corsou. E tabata asina lew cu guarda costa hulandes a pidi ayudo di guarda costa mericano cu a pone man riba e tripulacion illegal y e 150 kilo di cocaina.

CONTESTA DI PREGUNTA

A base di esey, a surgi un tres pregunta e mesun luna pa gobierno riba e tema. E preguntanan a wordo contesta awe, y tambe a duna claridad riba e pregunta di si tin cifra con hopi e traficacion di droga ta for di Venezuela pa e islanan hulandes caribense. Aki a bisa cu no tabatin cifra pues confirma, pero a duna si un cantidad cu ta cuantioso di droga captura for di comienso di aña te cu awor.

CAPTURA

Segun Koenders, e bista di captura ta varia, unda cu tin biaha ta papia di captura chikito, pa cual ta uza barconan mas chikito. Di otro banda, ta papia tambe di barconan grandi unda cu hunto cu Merca y guarda costa, p.e na mei ultimo, a captura 6.000 kilo di marihuana. E captura mas grandi di droga.