Rector Colegio ta splica mayornan via carta riba suspension alumno

ORANJESTAD – E suspension di un alumno di Colegio Arubano ta berdad, -y mas importante-, e tabata necesario. “Nos no ta haci esey facil pero tabatin motibonan valido pa haci tal” rector di Colegio Arubano Hans Timmermans ta bisa den un carta manda pa mayornan awe dialuna. NoticiaCla.com a pone su man riba e carta, den cual e rector ta duna un splicacion atrobe di e.o. e disturbionan di siman pasa y cosnan cu ainda ta circula cu ‘no ta cuadra’. NoticiaCla.com a acerca e rector pa un reaccion, pero e la opta pa manda e carta pa mayornan. Y esey tabata e meta principal di e carta.

MAS CLARIFICACION

“Ainda tin tur sorto di cuenta den prensa, pero tambe entre mayor y alumnonan, di loke a sosode siman pasa diamars y e efectonan despues” e rector ta cuminsa pa bisa den e carta. “E cosnan mas pret cu mi a tende ultimo dianan, ta cu no por hunga domino mas riba e tereno. Completamente absurdo!” e rector ta sigui bisa. Tambe e hecho cu e lo a wordo menasa cu morto via rednan social, tambe e rector ta desmenti. Of por lo menos, ta bisa di no ta na altura di dje.

SUSPENSION CONFIRMA

Esun mas serio pero cu si ta wordo confirma, ta e hecho cu a suspende un alumno recientemente pa algo cu e lo a haci. Mientras cu e rector no ta bay den detayes riba e motibo, e ta sigura cu no tuma e paso di suspension sin mas. “Pero den e caso aki nos tabatin motibonan suficiente pa haci tal”. E ta pidi comprension pa e hecho cu mas detayes e no por duna ya cu ta trata di interes di e mucha. “Nos a pensa bon riba e caso aki prome di tuma e paso aki y no a tuma risico”. Un di e preguntanan di NoticiaCla.com tabata e motibo di e suspension, ya cu e rumornan cu tabata circula, ta lo a compara e rector cu e imagen di e dictator aleman di di dos guera mundial Hitler, riba Facebook. E rector no a reacciona riba nos peticion.