Gobierno kier bende warda di Playa y traha uno nobo

ORANJESTAD – Gobierno ta evaluando pa bende warda di polis di playa y traha uno nobo. Pa hopi tempo caba varios departamento di polis ubica eynan a keda traslada pa otro partinan. Y pa por uza e edificio, mester sea renoba esaki of traha uno nobo. E minister encarga Arthur Dowers a indica e siman aki cu tin pensa pa tuma e paso porfin, aunke e decision final ainda no ta tuma.

POSIBILIDADNAN

Un eventual benta lo genera fondo cu cual por traha esun nobo, completo cu celnan, ya cu esun actual su celnan no ta den uso. Mientras cu e decision no ta tuma ainda, ta spera si cu e ta uno lihe. Y si scucha e mandatario, e preferencia ta pa bende y despues traha uno nobo. Tereno no ta problema, y tin algun den mente caba cu ta cuadra cu e criteria pa tin un warda di polis. Central, sigur y cu tin concentracion di hende.