OM no ta descarta mas detencion den caso disturbio di augustus

ORANJESTAD – Si resulta for di e imagennan (tuma di e disturbionan di 27 di augustus 2015 na parlamento) cu mas investigacion ta necesario, anto lo bin mas investigacion. Pa diabierna awor ministerio publico tin mas claridad si ta prolonga detencion di e tres personanan deteni relaciona cu disturbionan na augustus. “E caso ta sigui den investigacion di tur manera”, vocero di ministerio publico Ann Angela a sigura NoticiaCla.com awe mainta.

IMAGENAN

E imagennan aworaki ainda ta wordo investiga y analisa segun Angela, y si for di e imagennan aki y-of for di e investigacion, resulta cu tin mas sospechoso, anto lo actua riba esey tambe. Segun Angela, esaki tin di haber met name cu e rumornan tocante un "schutter", esta un tirado. Tur esey mester tin mas claridad ariba pa diabierna awor. Te aworaki tin tres persona deteni ainda (na KIA) cu ta J.G, Rvd B, y F.S.G. E dosnan cu a haya nan libertad (por lo pronto) ta I.I.L y J. M.

PROLONGACION

E ultimo prolongacion tabata dia 7 di september ultimo.  "E grupo di 3 ta deteni riba sospecho di a comete violencia riba e dia di iregularidadnan dilanti parlamento".

MOTIVACION PA PROLONGACION

Motivacion di fiscal pa pidi pa prolongacion, ta pasobra e ta ‘relaciona cu e seriedad di e hechonan di cual nan ta wordo sospecha y cu mester mas investigacion”. Riba esaki e huez comisario lo dicidi dialuna awor.

E SUSESO

Despues di e disturbionan diahuebs ultimo, polis a detene 12 persona inicialmente, y despues a laga 7 bay. A keda 3 persona cu si no a recobra nan libertad y ainda ta sera. Nan a haya dos dia di inverzekeringstelling y 8 di prolongacion di esey. Den nan caso, OM ta analisa cu nan a wordo deteni dia 28 (di augustus y a wordo ‘in verzekering gesteld riba dia 30 (di augustus). “Djey ta cuminsa core e 8 dianan, cu ta termina dia 7”.

PROTESTA Y CONCIENTISACION

Mientrastanto un grupo di simpatizantenan diahuebs atardi ultimo a cuminsa un tipo di ‘protesta’ y ‘concientisacion’ dilanti di Centro Di Husticia na Santa Cruz. Aki varios persona, incluyendo lider di MEP Evelyn Croes, a hiba discurso y a cuminsa pidi pa e libertad pa e grupo di persona aki, cu nan ta considera cu no por wordo teni deteni mas largo. NOTA: Foto ta di e anochi di disturbio di dia 27 di augustus ultimo.