Cargonan contra ex general Hugo’ El Pollo’ Carvajal conoci

ORANJESTAD/MIAMI – Documentonan obteni pa NoticiaCla den fin di siman ta indica cu e ex general venezolano , -encarcela na Aruba for di diaranson anochi ultimo-, tin acusacionnan basta serio contra dje (lesa e cargonan oficial contra Carvajal aki) pa cual Merca ta interesa den su extradicion. Diahuebs ultimo e acusacionnan aki a bira conoci, cual acusacion NoticiaCla a haya den su poder den fin di siman. Segun e documentonan aki, Hugo Carvajal, -conoci como ‘El Pollo’-, ta acusa di a asisti e baronnan di droga manera defunto Wilber Varela pa permiti nan exporta nan carganan di cocaina for di Venezuela, y proteha nan di eventual captura. Tambe di ta proveedor di informacion riba informacion militar y policial venezolano. A cambio, Varela lo tabata soborna Carvajal y otro oficialnan di rango halto militar y tambe otro tipo di autoridad venezolano.

Carvajal hunto cu otro oficialnan venezolano ta acusa di a inverti den e cargamentonan di contrabanda pa Merca. En particular, ta sugeri cu Carvajal tabata bende 100 kilo di cocaina na un miembro di Varela den e cartel di “Valle del Norte’ na Colombia. Varela, cu a move su operacion di cocaina di Colombia pa Venezuela na 2004 pa evita captura, a wordo mata na 2008. Pero e actonan di soborno entre e top di e oficialnan chavista y e cartel, continua, segun e documento te 2010. E documento mes tabata seya for di mei di 2013.

Carvajal ta riba e lista preto di e departamento di finanza di Merca (mira e lista completo aki) , bou di e regulacionnan narcotico externo di caponan. “E ta un di e poco oficialnan militar venezolano riba e lista”. Tur esaki ta pone cu Carvajal ta bira un persona hopi importante pa Merca, cu tin hopi informacion cardinal pa bringa e traficacion di droga. Y cu esaki den mente, e ta bira un blanco peligroso na Aruba, ya cu tin hopi cu lo kier mira e persona aki morto pa e no ‘basha abou’. Esey ta splica tambe e nivel di proteccion cu Aruba tin aworaki rond di su detencion, y cu ta evaluando pa transferi su detencion pa un lugar mas sigur y no asina ‘visibel’ pa mundo.