Parke solar na aeropuerto tin retraso

ORANJESTAD - E proyecto di parkeo solar tin un retraso. Director di aeropuerto Peter Steinmetz ta puntra su mes kico e problema ta pasobra no ta mirando movecion riba e tereno aki. A busca contacto cu e compania Fefix cu tin e contracto y nan a sigura AAA NV cu no tin nada particular. "Pero esey no kier men cu no tin retraso segun ami" Steinmetz a sigura NoticiaCla. A pidi nan pa duna informacion di kico e planificacion actual ta bira di e proyecto pasobra cu no ta bay logra e planning problema, ta hopi cla. "Tin un retraso" Steinmetz ta sigui bisa, mustrando cu pa basta luna no ta mirando un adelanto riba e proyecto. A mira trahamento den e prome cuartal di e anja pero aworaki no tin masha poco te nada di trabou tumando lugar. "Nos lo kier completa e proyecto mas lihe cu ta posibel pa nos por sigui cu nos producto di aeropuerto mes" e director ta sigui splica NC. E trabounan debidamente a sufri bou di e trabounan aki. Steinmetz ta confirma cu aworaki aeropuerto ta prestando un producto malo, pa loke ta e parti di parkeer di e cliente y esnan cu ta huur tereno di parkeer. "Esaki no ta optimal e momento aki. Unabes cu e proyecto aki ta cla, e ora si por beneficia cu por ofrece parkeo di auto den sombra, y por genera energia aunke esaki aeropuerto no tin beneficio di dje segun e director mes ta bisa NC, pasobra loke wordo produci, ta bay directamente pa e red di Elmar. "E unico cu nos por bisa ta cu nos lo por ta 'neutral' den e uso di energia ya cu loke nos lo produci na energia riba parkinglot, nos ta gasta den nos operacion". Tabata un tempo atras cu a cuminsa cu e trabounan riba e sitio di parkeer di aeropuerto, unda cu e idea ta pa converti parti di e aeropuerto den un asina yama 'solar park' cu tin cu genera coriente pa e red di Elmar. E proceso di bidding e tempo ey, no a bay manera cu tabata mester, cu a crea un tardansa den e producto, ya cu mester a haci esaki di nobo. Unabes cu a conoce e compania cu a haya e proyecto, esaki por a cuminsa. Pero pa basta tempo, manera cu Steinmetz ta mustra, no tabatin trahamento riba e tereno y ta parse cu cos a para completamente. No ta mira mas movecion, aunke cu e compania envolvi ta sigura cu no tin nada stranjo tumando lugar.