Aubert Wiels lo divulga culpabel intelectual di morto di Helmin

WILLEMSTAD –E ruman homber di defunto politico Helmin Wiels, Aubert Wiels ta bay revela e nombernan di esnan cu lo a ordena e morto di su ruman. Por lo menos esey ta e intencion segun Persbureau Curacao ta raporta awe. Segun e lider di Team Magno, e ta haya incomprendibel cu riba caya tur hende sa ken nan ta, pero cu ministerio publico no ta haci nada. Siman pasa el a duna OM un ultimatum. Prome cu esey, e ruman di Helmin Wiels a bisa cu e culpabel nan intelectual mester wordo busca den seno politico y di mundo di casino.

ASESINATO

Tabata 5 di mei 2013 cu e politico Helmin Wiels a wordo tira mata na Corsou. Mientrastanto e culpabelnan a wordo gara, sentencia y ta encarcela. Awor ta trata di esnan cu a duna e orden pa e asesinato tuma lugar. Y esey lo mester tuma lugar awe, esta e mencion di nombernan di esnan culpabel. Foto cortesia Persbureau Curacao