A cuminsa parti boet pa empresanan cu a viola ley di admision

ORANJESTAD – Autoridad encarga cu e proceso, a cuminsa parti boet pa empresa relaciona cu violacion di e ley di admision. Y NoticiaCla.com a confirma cu algun compania lo haya multa bastante halto. Entrante dialuna, e partimento di boet lo cuminsa y como tal varios empresa lo haya esaki e curso di siman aki. Tabata durante controlnan efectua riba cumplimento di e ley di admision, a keda constata na diferente establecimento diferente violacion.

CANTIDAD DI EMPRESA CU A VIOLA

Un total di 70 empresa a haya bishita di control den e promer luna. 90 % di e empresanan aki tawata den violacion di un of mas regla di e ley di admision. Despues cu a duna tur e empresanan aki oportunidad pa entrega nan comentario riba e intencion di aplica boet pa e violacion(nan) di e ley di admision constata na nan establecimento, awor a bai over na actua segun maneho vigente. Cual paso ta ser tuma ta depende - di e sorto di infraccion, cantidad infraccion cometi, si ta di promer biaha of no y basa riba e circumstancianan - y finalmente e por resulta den sea un advertencia por escrito of a duna na empresanan un boet segun e maneho vigente. E boet aki por yega te un maximo di Afl 25000,-- pa cada infraccion den caso cu ta trata di un empresa cu ta un entidad huridico. Y por yega te na Afl 10000,-- maximo pa un infraccion dor di un e dunador di trabou cu no ta un entidad huridico (=persona natural)

PERIODO DI AMNESTIA SPECIAL A FINALISA

Manera ta conoci, pa algun aña gabinete Mike Eman 1 y 2 a aplica un amnestia special y a brinda esnan cu pa un of otro motibo a cai den e circuito illegal e oportunidad pa pidi un permiso temporario di admision. Un cantidad di persona a haci uso di e oportunidad cu a brinda. Tambe na mes momento a brinda empresanan e oportunidad pa pone tur cos na ordo. Durante dicho periodo a haci control riba cumplimento cu ley di admision, pero no a aplica e boet administrativo sino a opta pa duna e dunador di trabou solamente advertencia verbal. Y si a encontra cu trahadornan sin permiso legal di estadia, a bai over na deportanan.

PERMISO DI ESTADIA

NoticiaCla.com a compronde cu si e ley di admision no ta aplicabel pa bo of bo tin admision a base di ley, bo no mester di permiso di estadia pa biba y traha aki na Aruba. Demas personanan stranhero cu tin intencion di biba y/of traha na Aruba ta rekeri di tin un permiso di estadia temporario valido pa por biba y eventual traha aki na Aruba. Tur aplicacion pa un permiso di residencia y trabou, mester ser entrega na DIMAS. Por download tur formulario, tur lista di rekisitonan y tambe haci un cita online via www.dimasaruba.com.

VIOLACIONNAN PA CUAL POR APLICA BOET ADMINISTRATIVO

Investigacion haci ta mustra cu tin por lo menos 5 caso pa cual por aplica pa boet administrativo.

1.Ta prohibi pa tuma of wanta un persona como trahador iregular den bo servicio, esta sin cu e ta dispone di un permiso / titulo legal di estadia;

2. Ta prohibi di tuma of wanta un persona como trahador den bo servicio mientras cu e ta dispone di un permiso/titulo di estadia pa traha na bo empresa pero no den e funcion den cual a hay'e ta labora;

3.Ta prohibi pa tuma of wanta un persona como trahador den servicio cu ta dispone di un permiso/titulo legal di estadia, pero di cual su permiso/ titulo legal di estadia tin un limitacion/ prohibicion cu e persona no mag di traha cu e titulo ey;

4.Ta prohibi pa tuma of wanta un persona como trahador den servicio cu ta dispone di un permiso/titulo legal di estadia, pero e permiso/titulo di estadia aki a keda emiti pa e traha den un cierto funcion na un otro dunador di trabou;

5. Ta prohibi pa laga un persona cu no ta dispone di un un permiso/titulo legal di estadia haci trabounan los;

TEMPO TIN PA CANCELA E BOET

E dunador di trabou tin 6 siman di tempo pa cumpli cu pago di e boet cu a dun'e. Den caso cu e empresa no cumpli dentro di e termino stipula, lo procede pa manda un reprimanda y si ainda e no cumpli, lo procede pa aplica pasonan huridico (dwangbevel) pa cobra e suma cu debe na boet.