Premio “Appel di Oro” rindiendo honor na excelencia den enseñansa

ORANJESTAD - Diahuebs mainta Minister Michelle Hooyboer-Winklaar a introduci e premio pa rindi honor na esunnan cu ta desplega excelencia den nan trabao diario den enseñansa. Ta acepta nominacion den 18 diferente categoria, cu ta inclui no solamente maestro y docente, pero tambe e cabesante y e personal di apoyo. E premio cu e ganadonan lo ricibi a haya e nomber “Appel di Oro”.

EXPERIENCIA EXCEPCIONAL

Hooyboer-Winklaar ta invita tur hende cu tabatin un experiencia excepcional cu un miembro di e personal di nan scol of den nan pasado como studiante na un of otro scol, pa nomina e persona aki pa medio di www.ea.aw (Appel di Oro). Riba e website tin un formulario cu por wordo yena y manda bek online, pero tambe, esunnan cu no tin acceso na internet of ta desea di “print” e aplicacion y yen’e por entrega esaki tambe na Departamento di Enseñansa, Frankrijkstraat 3 na Eagle. E ultimo dia pa entrega un nominacion, ta dia 30 di september 2015. A splica cu a declara october como Luna di Enseñansa y ta poniendo un enfasis y enfoke grandi riba esunnan cu ta brinda enseñansa durante di e luna aki.

ACTIVIDADNAN PLANEA

E mandatario a anuncia e actividadnan planea pa e celebracion special aki. Lo presenta diferente tayer y momentonan di intercambio pa educadornan trahando riba diferente nivel. E invitacionnan ta bayendo via di e directivanan di scol.

PROME SIMAN OCTOBER

Durante di e prome siman di october lo tuma luga un serie di tayer di Conscious Discipline, un metodo pa desaroyo social/emocional cu ta wordo uza na diferente scol na Aruba. Na e ocasion aki lo trece Aruba esunnan cu a desaroya e metodo aki na Merca pa asina nan comparti diferente tip valioso cu e educadornan. Den e di dos siman di october, lo tuma luga tayernan pa introduci e cambionan pa cu implementacion di “kerndoelen” pa e materianan “rekenen” y “wiskunde” pa tur maestro di scolnan basico, cual ta unda cu e kerndoelen ta wordo introduci e aña escolar aki. E tayernan aki ta tuma luga for di dia 14 pa dia 22 di october. Den e ultimo siman lo tuma luga dos tayer dirigi na e director y cabesantenan di scol. E programa ta enfoca riba calidad y kico ta importante pa un lider. E curso ta hopi intensivo y ta tuma luga riba dianan 26, 27 y 28 di october.

ULTIMO CICLO

E ultimo ciclo di charla ta tuma luga riba dianan 27 y 28 di october. E charlanan, basa riba “Best practices”, ta wordo duna pa un decano di e College of Education di University of South Carolina. Aruba tin un bon relacion cu e universidad aki unda cu tin tambe varios studiante trahando riba nan enseñansa superior. Minister Hooyboer-Winklaar a avisa docentenan pa keda pendiente pa e informacion pa nan inscribi pa tayernan pa medio di nan scol y directiva di scol.

ARIANSA TODD

Araisa Todd, kende ta relacionista publico na Departamento di Enseñansa a splica cu tin un comision di hurado, kende ta hendenan cu tin un relacion estrecho cu enseñansa. A invita un miembro di e team di inspeccion, un maestro pensiona di SIMAR, un miembro di e team di Departamento di Enseñansa y un miembro di e team di Ministerio di Enseñansa. Tambe a inclui un miembro di Parlamento Hubenil pa asina tin e contribucion for di un persona cu por comparti e perspectiva di hobennan. Ta invita comunidad di Aruba pa subi e website www.ea.aw y nomina e persona cu nan ta haya ta merece un Appel di Oro. E premio Appel di Oro ta reemplasa e premio cu a wordo duna pa cinco aña consecutivo, esta Maestro di Aña; e ta inclui mas categoria.