Aruba a gana premio pa Happy Flow checkin na Las Vegas

LAS VEGAS – E proyecto di check-in di Aruba conoci como ‘Aruba Happy Flow’, a gana e premio di ‘Best Inmigracion & Arrival Initiative’ durante e di 5 “Future Travel Experience Awards Ceremony” na Las Vegas, Nevada. E intencion tabata pa reconoce e miho aeropuertonan pa nan intento sobresaliente pa mehora e experiencia di e pasahero. E evento tabata na Mandalay Bay Resort, unda cu mas di 600 ehecutivo di biahe di aerolinea, aeropuerto, instancia gubernamental y facilitadonan tabata presente.

PREMIO PA ARUBA

E premio cu Aruba a logra ta basa riba e proyecto cu na mei ultimo a keda revela y presenta na aeropuerto di Aruba. Aki ta splica e proceso completo di con e ta funciona, y con e ta wordo considera como un inovacion riba tereno di procesa pasahero pa asina nan tin menos dolor di cabez. E tabata e proyecto piloto unico y inovativo a wordo lanza na mei na Aeropuerto di Aruba: Aruba Happy Flow. E ta un proceso di pasahero inovativo unda e pasahero ta wordo rekeri pa mustra su paspoort solamente un biaha durante e proceso na aeropuerto. E lanzamento oficial a wordo haci pa prome minister   Mike Eman. E ultimo di un serie di orado, James Fazio a porta describi e impacto di e proyecto miho. “E la pone aeropuerto di Aruba riba mapa”. Wak e video di demonstracion aki. 

IMPRESION

E proyecto su impacto y importancia por a wordo midi tambe pa e lista impresionante di bishitante local pero mas ainda di afo. Varios di nan, apenas algun ora na Aruba (despues di un biahe di 9 ora) manera presidente & CEO di Schiphol Group Jos Nijhuis, Senior Vice President di KLM Security Services Ben Swagerman, y Senior VP di Vision-Box Miguel Leitmann. Y nan palabranan di elogio, tabata indica cu si tabatin cualkier duda, Aruba a prueba tur hende robes awe. Y esun cu a haya tur e elogio awe, tabata prome minister Mike Eman. “Bo terkesa y determinacion a pone cu awe e proyecto ta operacional”, Nijhuis di Schiphol, a sigura e prome mandatario di Aruba.

HAPPY FLOW

Pa loke ta e proyecto mes, e ta algo cu no tin niun caminda na mundo. Y su meta ta pa facilita e pasahero, yega mas lihe na e ‘porta di salida’, y manera gerente di operacion di aeropuerto, Jürge Benschop a bisa, ‘duna e pasahero mas tempo pa shop’. E uso di reconocimento facial ta permiti pa e pasahero por sigui pa check-in, drop off su maletanan, pasa imigracion y aborda avion, tur sin mester wordo pidi pa mustra su boarding pass atrobe. Pa por haci esaki, Aruba Happy Flow ta combina e proceso di control di imigracion hunto cu e proceso priva di e pasahero na aeropuerto. Esaki ta unico na mundo y a wordo diseña pa facilita e proceso di pasahero, haciendo e liher y sigur.