Alumnonan procedente di MAVO cu problema caba na Colegio

ORANJESTAD – Tin un grupo di 25 alumno cu a drenta Colegio Arubano recientemente for di MAVO, cu ya ta confrontando problemanan, den e prome 4 siman di aña escolar nobo. Particularmente esnan cu tin den nan pakete di estudio, e materia ‘wiskunde B’. Rector di Colegio Arubano Hans Timmermans a confirma na NoticiaCla.com cu nan ta parti di e total di entre 65 pa 68 alumno di MAVO cu a drenta Colegio Arubano na comienso di e aña escolar nobo. For di e grupo aki, 60 a drenta basa riba e normanan rigido poni pa e scol.

SENTENCIA

E sentencia cu a cay recientemente cu a duna gobierno rason pa ‘simplifica’ e normanan aun mas pa duna mas espacio pa alumnonan di MAVO pa Colegio Arubano, ta berdad un ‘victoria’ pa e mandatario, segun e rector. No ta asina cu nan ta bay trata e alumnonan aki di un forma inferior. De hecho, Timmermans a duna orden specifico na tur su docentenan, cu ta prohibi pa haci comentarionan deningrante den direccion di e alumnonan di MAVO. “Si mi mester tende lo minimo di esaki, di cualkier docente, nan tin un problema serio cu mi” Timmmermans a sigura NoticiaCla.com. “Mi a bisa, nos ta bay haci tur e esfuerso, manera cu nos ta haci cu nos propio alumnonan, pa e alumnonan ey por gradua tambe. Mi no ta odia alumnonan di MAVO, mi kier pa nan tambe logra haya un diploma di HAVO” Timmermans a bisa. Pero mescos cu no por garantisa cu su alumnonan ‘original’ di HAVO no tin garantia cu nan ta slaag, e no por duna e garantia tampoco pa esnan cu ta bin di MAVO.

WISKUNDE B

Segun e rector e la haya notificacion di su docente di wiskunde B, cu ya caba tin un grupo grandi di alumno (25 total) procedente di MAVO, cu a confrontando problema serio cu e materia y cu no ta pinta bon pa nan. For di e grupo aki tambe tin e chens cu pa otro materianan tambe nan no ta pasando bon. Mes momento Timmermans ta desmenti cu Colegio a forza tur alumno procedente di MAVO, pa tuma Wiskunde B. “No ta berdad. E tin tur cos di haber cu e perfiel cu e alumno ta scohe. Si un alumno scohe pa un tipo di perfiel, tin cu cumpli cu algun materia obligatoriamente. Y un di nan ta wiskunde B, cu ta un nivel mas dificil cu wiskunde A, cu ta ‘mas facil”. Esey no por segun Timmermans, pasobra esey no ta den e perfiel.

EXTRA ATENCION Colegio, segun Timmermans, a scohe pa, -sin ainda a haya e aprobacion di e minister-, pa duna e alumnonan di MAVO extra atencion den forma di les di mentornan. E intencion ta pa tin mentornan cu ta guia e alumnonan aki riba p.e un diasabra pa nan por toch haya e atencion extra. Entre otro ta yuda nan cu e forma di studia, y bira tambe mas independiente. Sigur si bo bin di un scol chikito pa un scol di mas di 1500 alumno. “Esey nos ta paga nos mes como scol. Pasobra mi no a haya ningun aprobacion ainda cu nan lo bay cubri e gastonan aki”. E rector a bisa NoticiaCla.com cu dos siman pasa a manda un carta pa e mandatario pa por subsidia placa extra pa por paga pa lesnan extra (bijles) pa wiskunde B. E ta bisa di a haya un docente dispuesto pa tur diasabra mainta pa un cantidad di ora, duna les extra riba e materia aki. Asina e alumnonan aki ta bon prepara. “Esey ta duna e indicacion di e empuhe cu nos como scol ta duna. Nos no a haya ningun contesta positivo di e minister, siendo cu pa diasabra awor tin cu cuminsa cu e lesnan aki. Si no haci ‘e awor, e grupo aki lo haya su mes den problema”. Si bo haya un ‘onvoldoende’ pa e materia aki, e ta bira un problema serio pa e alumnonan, segun Timmermans.

POSIBILIDAD REALISTICO

Ta completamente ridiculo, segun Timmermans, pa bisa cu tur alumno di MAVO, por haya un diploma di HAVO. “Mi ta kere cu ta politica ta pensa asina, y cu tin cu duna nan tur un chens. Si e ora nan no logra, bo por demostra por lo menos, cu nan a purba”. Mientras cu e no ta menciona nomber di e mandatario en cuestion, Michelle Hooyboer Winklaar, e ta referi na dje. “Mi ta pensa di forma opuesto. Esey tambe nos kier men cu e normanan estricto. Nos tin nan, pasobra nos kier mantene e chens pa exito, di un forma mas grandi posibel” Timmermans a sigui bisa. Segun e rector, ningun hende ta bon sirbi si despues di algun siman caba, un grupo di alumno ta ‘frustra’, pasobra nan no por cu e presion.