Croes: No duna deadline pa dialuna, y walk out diabierna prome

ORANJESTAD – E accion di trahadonan di DAS (departamento di asuntonan social) a bin como un sorpresa total pa e mandatario responsabel pa e departamento, esta Paul Croes. Segun su prome reaccion awe mainta na NoticiaCla.com, e mandatario a splica cu tin un carta di e trahadonan, cu ta duna gobierno ultimatum di 14 di september (dialuna awor) pa bin cu solucion. Pues e ta haya straño e incorecto cu ta bin cu un accion direpente diabierna.

RESULTADO DI REUNION

Segun e mandatario tabatin varios reunion cu e trahadonan y sindicatonan e siman aki, manera SEPPA y TOPA riba e topico aki. Aki e mandatario a confirma cu enberdad a bay di acuerdo pa duna un cantidad di espacio extra gratis pa e clientenan. A papia di 80 persona cu ta bishita e departamento tur dia. Riba esaki a opta (den consulta cu colega minister Otmar Oduber), a bin cu 22 lugar di parkeer, aunke e no ta suficiente segun e trahadonan a bisa. Sinembargo, e mandatario ta mustra cu no ta tur 80 pa 100 cliente ta bin pareu. “Si bo dividi esaki pa dia, tin un cantidad cu ta bin pa ora, durante curso dia. Pa e motibo ey, a bin riba e suma di 22” Croes a sigui bisa. Ora cu a puntra e contact persoon di e grupo cuanto espacio ta necesario, e contesta nunca mas a wordo ricibi. Despues a ricibi un carta ayera tardi 4’or dirigi na prome minister Eman, cu un deadline pa dialuna 14 di september. “Awor, bo no por duna nos un deadline te cu dialuna anto walk out diabierna. Mi ta haya esey onrechtmatig. E mandatario a confirma cu e sindicato TOPA y SEPPA no por a hustifica un walk out mirando cu e situacion di nan miembronan no ta asina grave. Ta apenas algun seconde (30) e trahadonan tin cu cana pa nan yega na e zona di parkeer gratis. Esey tabata un precupacion di nan. Mientrastanto a logra haya algun lugar mas pa e clientenan di sociale zaken. “Nos ta atendiendo cu e situacion debidamente” Croes a sigura NoticiaCla.com.