Dept asunto social den accion pa motibo di parkeermeter

ORANJESTAD – Trahadonan di departamento social (DAS) a protesta awe pa un ora, contra e introduccion di parkeer meter y e efecto cu e tin riba nan y nan clientenan. Actuando como nan vocero, Enid de Kort a splica cu mirando cu e reunionnan cu nan superiornan no a duna resultado, a dicidi di bay den accion pa un ora, y dependiendo di e resultado, nan lo a intensiva esaki. E problema cu nan tin ta cu no tin suficiente lugar pa parkeer pa nan clientenan, y pa nan tambe, nan no ta considera husto cu nan tin cu paga pa parkeer.

CANTIDAD LIMITA PARKEER

Segun de Kort, ta despues di dialogo cu minister, a logra haya un total di 23 lugar di parkeer gratis pa e clientenan di e departamento siendo cu nan ta ricibi entre 90 pa 140 cliente pa dia. “Pa nos esey no ta suficiente” de Kort a bisa. E trahadonan mes tin cu paga 75 florin of tin cu haci uso di e zonanan residencial pa cu esaki. Algo cu nan no ta contento cune, ni esun esnan den e zona residencial. Segun de Kort, gobierno lo a informa nan cu ta un luho cu nan ta den e zona ey.

UN SERVICIO Y NEGOSHI

Apesar cu nan no ta un negoshi, nan ta un servicio pa hendenan di menos recurso. Segun de Kort, a pidi pa no cay bou di e ley di parkeer. A mustra cu na otro paisnan, servicio di gobierno ta keda cu free parking. Nos a haci nos investigacion riba esaki” de Kort a sigui bisa. “Ta parse cu gobierno ta kibra su tarea, cu ta interes general di nos pueblo cu ta ensera duna servicio na tur hende di menos recurso”. Den e area aki tin mas departamento di gobierno cu ta dunando servicio, manera Centraal Accountants Dienst (CAD) cu tambe a uni cu nan welga. Clientenan ta haya stress segun de Kort, pasobra nan ta pura pa keda cla cu nan cita, pasobra nan tempo di parkeer ta cabando. Como tal e ta crea aun mas stress. Algo cu segun e departamento, no por. 

CAD TA JOIN

Gilda Arends cu ta control leider na Centraal Accountants Dienst  (CAD) a mustra cu e departamento ey tambe ta disgusta cu e situacion. Nan tabata bezig algun luna cu DIP y DOW pa haya e parti na banda di e edificio cu un hefboom pa asina e trahadonan di DAS y CAD por a haya lugarnan di parkeer. A wordo bisa cu esaki no ta un problema. Pero pa sorpresa, diabierna nan a ser informa cu e parcela ta wordo kita y duna den maneho di Aruparking. Como tal nan a haya e sorpresa ey. "Nos no ta di acuerdo. E mester wordo miho regla" Arends a bisa. E solucion segun nan, ta pa pone un hefboom pa e trahadonan.