Banco Central: Cantidad di placa den circulacion a subi

ORANJESTAD - Den e luna di Juni 2015, e cantidad di placa den circulacion a subi cu Afl. 36,6 miyon te na Afl. 3.609,3 miyon, causa pa un expansion di Afl. 48,1 miyon den e reserva di divisa netto. Un bahada di Afl. 11,5 miyon den e activo domestico netto a mitiga pa un parti e subida aki. E expansion den e reserva di divisa netto ta debi mas tanto na compra netto di divisa door di banconan commercial for di publico, principalmente relaciona cu turismo y otro inversion. E compranan aki a wordo parcialmente mitiga pa benta netto di divisa door di banconan commercial na publico asocia cu pagonan pa mercancia, y otro servicio. Un bahada di Afl. 25,2 miyon den transaccionnan no relata na credito, parcialmente mitiga pa un crecemento di Afl. 13,7 miyon den credito domestico, a causa e bahada den e activo domestico netto. Credito domestico a aumenta door di un subida den credito bancario na e sector publico, causa pa un caida den depositonan di gobierno. Di otro banda, credito na e sector priva a baha door cu bahadanan den credito na tanto empresa como na consumidor a wordo solamente parcialmente mitiga pa un subida den hipoteca pa vivienda.

INFLACION

E nivel general di prijs, cu ta wordo midi door di e indice di prijs di consumo (CPI), a registra un subida di 0,7 porciento den e luna di Juni 2015, compara cu Juni 2014. E componente “Vivienda”, cual a registra un crecemento di 1,4 porciento, tabata e contribuyente principal na e subida aki, bayendo di 0,1 porciento na Juni 2014 pa 1,4 porciento na Juni 2015. E aceleracion di inflacion aki ta debi primordialmente na e sub-categoria “Electricidad, gas y otro combustible” di e categoria vivienda, causa pa un aumento den tarifa di coriente na October 2014. Excluyendo e componentenan di cuminda y energia, inflacion a subi cu 0,7 porciento. Pa loke ta trata e promedio anual di e tasa di inflacion, esaki a permanece igual na 1,0 porciento na Juni 2015 compara cu Mei 2015.

TURISMO

Na Juni 2015, e cantidad di turista a registra 87.447 bishitante, cual ta 5,7 porciento mas cu na Juni 2014. E expansion di 10,1 porciento y 2,9 porciento, respectivamente, den tanto e mercado Latino Americano como e mercado Norte Americano, tabata responsable pa e crecemento aki. E subida den e mercado Latino Americano ta primordialmente e resultado di un aumento di 3.246 bishitante for di Venezuela. Un bahada den bishitante for di Brazil y Colombia a mitiga parcialmente e subida aki. E aumento den e Mercado Norte Americano ta e resultado di un subida di 1.913 bishitante for di Merca, mientras cu bishitante for di Canada a baha cu 398. Den e luna en cuestion, e cantidad di anochi destina pa pasa na Aruba a crece cu 3,7 porciento, compara cu e mesun luna di e aña anterior. E averahe di anochi destina pa keda na Aruba a baha un poco esta di 6,9 anochi na Juni 2014 pa 6,8 anochi na Juni 2015. E cantidad di turista crucero a subi cu 12,3 porciento te na 22.243 na Juni 2015, compara cu Juni 2014. E cantidad di barconan crucero a subi pa 9 na Juni 2015, for di 7 na Juni 2014.

ENTRADA DI GOBIERNO

Na Juni 2015, entrada di gobierno a suma Afl. 97,7 miyon, un bahada di Afl. 9,0 miyon compara cu e mesun luna di e aña anterior. E caida aki ta debi na un bahada den tanto entrada di impuesto di Afl. 7,8 miyon como na entrada no relata na impuesto di Afl. 1,2 miyon. E caida den entrada di impuesto ta relata principalmente na bahadanan di entrada di impuesto riba tereno, impuesto riba divisa y accijns riba tabaco. E bahadanan aki a wordo parcialmente mitiga pa subida di ingreso den impuesto riba ganashi y impuesto riba salario. Tambe, e impuesto ariba benta di negoshi (B.B.O.) a keda mescos na Afl. 7,2 miyon.