Aeropuerto kier pa desaroya ‘terminal Dakota’ den restaurant

ORANJESTAD - Recientemente Aruba Airport Authority N.V. (AAA) a anuncia publicamente cu nan ta buscando pa sa si tin interes for di sector priva pa un proyecto masha special y hopi sentimental. Nan preferencia ta si por logra haya un compania interesa na Aruba mes. Barbara Brown, Chief Comercial Officer di AAA a anuncia cu ta buscando un inversionista cu kier ta parti di e proceso di rescate di un di e monumentonan mas importante den historia di Aruba y un di e simbolo, actor y testigonan principal di nacemento y desaroyo di e industria di turismo cu tanto Aruba ta orguyoso di dje. “Aeropuerto Dakota ta e parti mas historico di e mundo di aviacion di Aruba”, asina Barbara Brown a expresa.

HISTORIA DI DAKOTA

A construi e terminal “Dakota” na aña 1942. E ta situa na e parti panort di e pista actual di aeropuerto. Den añanan 1950, cu construccion di e “schelp” na e parti panort, cu actualmente ta e edificio di “Yegada” di aeropuerto, e terminal bieu Dakota a bira e departamento di Brandweer. Den transcurso di añanan, a uza e edificio pa trabaonan di mantencion di avionnan chikito y despues di algun aña a sey’e y inclui’e den e cura di aeropuerto pa proteg’e miho.

AVISO PA INVERSIONISTANAN

AAA a publica un aviso, den forma di un “Request for Expression of Interest”, pa invita inversionistanan y/of desaroyadornan interesa pa presenta nan mes. Entre esunnan cu demostra interes lo organisa un destaho y for di eynan lo cuminsa e proceso di rescate y revitalisacion di e terminal Dakota. AAA ta determina pa preserva e parti importante aki di historia di Aruba.

VISION

Barbara Brown a splica cu AAA ta buscando e organisacion cu e mesun vision cu AAA, esta pa trece aviacion atrobe mas cerca di comunidad pa medio di un Café/Restaurant basa riba e tema “aviacion”, desaroya pa e inversionista interesa, na su propio gusto. E café/restaurant no lo keda den e cura di aeropuerto, pero e area lo wordo habri bek pa ofrece publico general acceso completo. E ta añadi cu e idea ta pa e inversionista traha hunto cu AAA y Monumentenburo riba preservacion di e edificio. E terminal Dakota tin un estilo “Art Deco”, cu dos luifel dilanti y un trapi pa bay riba e dak na banda. Esakinan ta elemento cu AAA lo kier mira preserva. Tambe Monumentenburo lo asisti den guia con pa anda cu un monumento y su diseño na e forma cu ta mantene e integridad y balor historico di e edificio.

MIHO BISTA DI PISTA COMPLETO

E café/restaurant aki tin un di e miho bistanan di e pista completo di aeropuerto y ta unda cu clientenan, tanto local como turista por sinta y disfruta di algo di come y bebe den un bon ambiente y un bista fabuloso. Inversionistanan interesa den un proyecto historico y pa ta un actor importante den e proceso pa salvaguardia un monumento berdaderamente unico cu un historia sumamente rico, por tuma contacto cu Aruba Airport Authority en conexion cu e “Request for Expression of Interest”.