Universidad di Aruba a nomina su miho studiantenan

ORANJESTAD - A nomina studiantenan di Universidad di Aruba cu a destaca durante e aña academico 2014/2015 pa e tradicional "Student Awards" y dialuna e institucion a anuncia e ganadonan durante di un evento special na e universidad mes.

ANOCHI PLACENTERO

Minister di Enseñansa, Michelle Hooyboer-Winklaar a referi na e evento como un anochi placentero, di celebracion di exito. El a felicita e studiantenan cu a gana un reconocimento, como tambe tur e nominadonan y a gradici nan pa nan aporte na comunidad di Aruba cu nan esfuersonan. Segun e mandatario, e Student Award ta un tremendo iniciativa y sigur ta algo cu mester stimula pa e bira algo mas grandi den futuro. El a remarca cu a pone e “spotlight” riba e studiantenan cu ta destaca y ta pone un luz positivo riba e universidad, y loke a scucha hopi durante di e ceremonia ta cu e studiantenan aki ta surpasa tur obstaculo pa yega na e resultadonan cu nan ta desea.

RESPONSABILIDAD ESTUDIANTIL

Algun di e studiantenan tin responsabilidadnan manera un famia y/of un trabao y apesar di e circumstancianan cu por hacie dificil pa nan, nan ta combina tur cos cu nan estudio pa logra asina hopi. E studiantenan aki mes ta remarca cu ta hustamente pasobra nan tin e responsabilidadnan of obstaculonan cu nan tin den nan bida, nan ta logra asina hopi. Nan ta surpasa tur barera y logra nan metanan cu positivismo.