Rectorado di Colegio Arubano y docente Capelo a haya otro

ORANJESTAD – Rectorado di Colegio Arubano y docente Alfredo Capelo a haya otro den un combersacion awe mainta. Den un reaccion na NoticiaCla.com awe merdia, rector Hans Timmermans a confirma cu Capelo a opta pa no bay mesora, sino mas bien despues di un termino. Tambe e lo keda yuda cu algun actividad escolar manera cu semper ela sa di haci.

PENSAMENTO DI CAPELLO

Segun Timmermans, diaranson Capelo a vocifera cu e ta hay'e duro pa bandona e dos klasnan cu e tabata duna les, asina sin mas pa no laga nan na caya. “Esey ta di elogia, cu e ta pensa riba e alumnonan” Timmermans a bisa. Esey no ta kita afo cu ya nan a haya un reemplasante pa Capelo su klas. Den su combersacion cu e rector, Capelo a splica e rector cu e dunamento di les ta afectando su salud y cu e ta cay pisa p'e. Y e rector a bisa cu kico cu pasa, e salud ta prome cu tur cos. “Abo por cay muri, pero scol ta continua. Scol no ta warda riba un hende ora cu e ta malo of muri. Salud ta riba tur cos”.

COMPROMISE

Partidonan a yega na otro, unda cu a palabra pues cu Capelo ta sigui duna les te fin di e prome periodo, cu ta finalisa 23 di september proximo. E ta keda organisa e biahe pa Colombia, y e ta haya un despedida di parti di e alumnonan fin di september, y coleganan mes ta dispidi di dje durante e gala di pasco fin di aña. Riba e pregunta cu si tur cos a normalisa na scol atrobe, Timmermans a bisa cu si. “Mi ta kere cu bo por bisa esey”.

DISPENSA DI ALUMNONAN

Algun otro asuntonan cu a keda colga y cu a conduci na entre otro e disturbionan (manera e rector mes a yama e asunto), ta cierto puntonan cu no a bin na ordo. Mes momento Timmermans a mustra cu e la ricibi cartanan di alumno cu tabata pidi nan despensa pa loke a sosode diamars ultimo. “Eigenlijk bo tabatin rason” hopi a skibi, argumentando cu antes (riba e tema di musica den pauze) tabata toca musica solamente riba dianan special manera carnaval y Halloween. Sigur no tur dia”. E rector ta conciente cu porta e decision di para musica abrupto, a cay malo, pero e ta sigui pensa cu e musica y e volumen di ultimo dia, tabata haci dificil pa alumno y docentenan por a papia cu otro. “Como tal, ainda mi ta para tras di e punto ey. Pero mi ta dispuesto pa papia cu leerlingenraad pa wak si por toca musica cu volumen abou, final di les diabierna. Pero no tur dia, tur pauze manera cu e la sosode prome”. E rector ta sinti cu e rosea cayente riba dje a kita atrobe. Algo cu el a haya teribel diamars. Awor cos a normalisa y ora cu e cana rond di scol, e ta cuminda alumnonan y ta papia cu nan di un forma mas normal.

DISTURBIO

Tabata diamars mainta cu e scol a conoce algun disturbio ora cu un cantidad di 600 alumno a opta pa protesta den forma di bisti na blauw scur y sinta abou riba pleinchi durante e prome dos lesuur. E motibo lo tabata rumornan cu a circula riba facebook riba desicionan tuma contra Capelo y su declaracionan contra e maneho di rectorado. Desicionan di rectorado lo a cunsumi Capelo di tal forma cu e la opta den forma abrupto un dia  prome pa tuma su retiro. Esey tabata suficiente pa crea un ola di reaccion tanto na scol y pafo di scol, di ex alumnonan cu a haya les den pasado di Capello. Na final ora cu e rectorado a splica tur cos kico ta kico, tur trankilidad a bin bek y cos tabata normal atrobe.