Aruparking: Te cu awor a takel apenas 11 auto

ORANJESTAD - Den tres dia a takel mas of menos 11 auto, pues no ta un cantidad grandi di loke por a takel, compara cu loke por a takel, segun vocero di Aru-parking Sanin Daou. E autonan cu a wordo getakel, ta pasobra nan tabata pone e trafico na peliger. Tambe ta autonan cu tabatin un sticker poni ariba pa mas di 4 ora sin cu a move esaki. Of camindanan cu ta prohibi pa para y toch nan a para. Ta casonan hopi extremo so a takel te awor. Como tal ta mustra cu si mester a actua di forma rigido, mas auto lo por a wordo getakeld. "Tin ainda hende ta parkeer unda cu no mag. Ta nos a opta pa ta mas soepel. Pa e motibo ey, e cifra ta solamente 11 auto te cu awor. "

ESPACION NECESARIO PA HOTEL 

E hecho cu cierto hotelnan ta reclama cu a kita lugarnan disponibel pa parkeer pa nan clientenan, no ta cuadra segun Daou. Nan a meramente, segun Daou, haya lugarnan cu nan por a usa pa marca y basa riba esey, nan a traha nan sistema. "Nos ta usando e tereno cu nos a haya pa usa" Daou  ta bisa. 

SMART CARD

Loke ta bayendo hopi positivo, ta e hecho cu ta usando mas smartcard cu normal. Hopi mas hende a cuminsa haci uso di esaki y ta "resell" mucho mas cu prome. "Nos ta hayando hopi comentario positivo di esaki mirando cu bo por recarga e carchi aki y e no ta caduca ni e placa cu tin riba dje. E ta haci'e hopi facil" Daou a bisa. 

FALTA DI INFORMACION 

Segun Daou, berdad ta hayando hopi peticion pa mas informacion di parti di turista, y ta purbando di acomoda tur hende cu esaki. Sea via facebook of website, cu ta kedando cla, y e chens ta cu pa awe tur informacion lo mester ta cla. P'esey a pidi tur hende pa mientrastanto mester acudi riba e pagina di facebook. 

NO TA CLA PA OPERACION

Un critica cu tambe ta coriendo ta cu tin indicacion cu Aruparking a sali den operacion sin cu e tabata cla p'e. Esaki sinembargo ta wordo desbarata. Cosnan nobo segun Daou semper ta conta cu resistencia. Sigur ora cu tin machine nobo, y situacionan nobo. Ora cu cuminsa instala machine, opera e machine, cosnan por pasa. No por premira tur fayo segun Daou, pero sigur no ta asina cu nan a ranca sali sin ta prepara pa tur cos. "Nos ta trahando hopi duro pa contesta tur pregunta. Nos ta haciendo nos best pa informacion yega mas liher cu ta posibel. Critica semper lo bin, aunke nos sa cu nos ta haciendo nos best y ta haciendo un bon trabou."