WEB: Interface nobo pa mihor intercambio di datonan di cliente Web y Elmar

ORANJESTAD – Mientras clientenan no a ripara mucho, tras di cortina e teamnan di servicio na cliente y ICT di WEB y ELMAR den fin di siman a yega nan punto culminante pa lo cual ta trata interconexion di nan sistemanan di cliente. Diadomingo ultimo e directornan di WEB y ELMAR a formalisa e validacion di e traspaso corecto di dato pa nan sistemanan di cliente. Esaki a bira posibel door di un interconexion nobo pa laga e sistemanan di ambos compania conecta y intercambia dato mas facil cu otro. Firmamento di e validacion ta resultado di un cooperacion estrecho entre WEB y ELMAR pa sirbi e cliente mihor, specialmente riba plataforma tecnologico.

EXISTI CABA

Desde aña pasa WEB y ELMAR ta traha hunto pa laga e sistemanan di ambos compania conecta y intercambia dato. Esaki ta necesario pa clientenan por haci pagonan relaciona cu nan consumo di awa y coriente na diferente localidad.

E interconexion entre e sistemanan tawata algo existente caba. Cu e sistema di cliente nobo di ELMAR, a bira mas importante ainda pa tin un bon interconexion entre sistemanan di ELMAR y WEB. P’esey mester a desaroya un ‘interface’ mas moderno, apto y compatibel.

DATA

Cu e interface nobo WEB y ELMAR awor tin tur dato di cliente al dia y clientenan por sigui haci pagonan relaciona cu nan meternan di awa y coriente na loketnan di WEB, ELMAR, Hulpbestuurskantoren y banconan.

ACEPTACION FIRMA

Despues cu a implementa e sistema nobo di ELMAR, a controla den fin di siman ultimo, e datonan cu ta pasa di e sistema di WEB pa ELMAR y visa versa. E teamnan di WEB y ELMAR a haci e validacion pa salvaguardia cu datonan di clientenan di ambos compania ta corecto y ta pasa bon via e sistemanan.

Pa formalisa e validacion y aceptacion pa ambos compania, diadumingo dia 6 di September, director interino di WEB, Luis Oduber y director di ELMAR, Robert Henriquez a firma e aceptacion den presencia di nan teamnan di servicio na cliente y ICT. E directornan a expresa nan satisfaccion y gratitud na e teamnan pa e logro aki y pa e forma di cooperacion cu otro.