Partido MEP lo aclama Wever pa lider atrobe durante congreso

STA CRUZ -- Partido MEP ta organisando su proximo congreso fin di e luna aki, esta dia 27 di september. Segun statuut di e partido, cada 4 aña e partido mester eligi un lider. Y awor ta 4 aña caba cu sra. Evelyn Wever-Croes a wordo eligi. Asina esun responsabel pa organisa e congreso, Rudy Richardson a laga sa. Pues ta toca turno pa organisa e Congreso 2015. E preparacionnan ta practicamente cla y ta preparando pa tene e congreso cu varios invitado internacional di e partidonan ruman den islanan y paisnan den region.Durante e conferencia di prensa di MEP na Cede di MEP Parlamentario Glenbert Croes a splica cu partido Movimiento Electoral di Pueblo concientemente den conseho di partido a dicidi unanimamente pa aclama Evelyn Wever-Croes como lider atrobe pa e sigiente 4 aña. Esaki pa motibo e forma abrumador di e votonan cu e lider haya riba su nomber ultimo eleccion, ta obvio cu e tin e voto popular y e mandato cu ta bai dune pa continua cu e labor 4 aña mas. 

GASTONAN DI CONGRESO

Cas di Cultura tin un significacion emocional hopi valioso pa partido MEP. Eyden mayoria di Congresonan di MEP a tuma lugar. Eyden sr. Nel Oduber a wordo aclama lider di partido, y Betico Croes den felis memoria tambe a tene varios Congreso den Cas di Cultura. Un lugar pues cu nan tin recuerdonan bunita pa partido MEP. Considerando tambe e gasto envolvi cu otro lugarnan y considerando e situacion financiero malisimo di Aruba, a scohe pa organisa Congreso 2015 na Cas di Cultura.

ESNAN INVITA

E Congreso 2015 ta habri pa tur hende, especialmente tur simpatisante di partido MEP, lidernan di bario, campañadonan y nan famia. Pueblo di Aruba tambe ta keda invita pa e Congreso aki. E mesun fin di siman partido MEP ta anfitrion di e Congreso di COPPPAL, cu ta Conferencia Permanente de Partidos Politicos de America Latina, y varios delegado di otro pais lo ta presente na nos Congreso. Na final di e anochi lo tin un rifa di un auto Hyundai EON 2015. E invitacion oficial y e programa oficial lo wordo publica den medionan di comunicacion den e siguiente dianan, manera nos Statuut ta prescribi. Entrada ta completamente gratis.