Aruparking: No ta klem auto e siman aki ainda

ORANJESTAD – E siman aki ainda Aruparking lo ta ‘soepel’ cu maneho di e parkeo y ponemento di klem, dunamento di multa etc. Segun e vocero di e compania, Sanin Daou, den tres dia a takel apenas 6 auto, y no a pone klem ainda. Esey lo sosode mas sigur den curso di otro siman. Pues e siman aki ainda no ta pone klem. Autonan cu a wordo getakeld ta pasobra nan tabata pone trafico na peliger, segun Daou.

PAKICO NO TA KLEM

E motibo pa no klem ainda, ta pa evita cu hende ta haya nan mes den gastonan innecesario . “Si tin hende cu a comete infraccion, pero nos a bisa tambe cu nos ta bay ta mas soepel cu auto. Pero e parti di towing ta cu nos tin cu stress ainda cu hendenan tin cu tene cuenta unda nan ta parkeer”.

‘FREE PARKING’

Critica tambe tin hopi, unda cu hendenan ta yama y reclama cosnan cu nan ta sinti cu no ta bon. Entre nan, e asunto di pick up y delivery. A mustra cu tin e posibilidad di para bo auto menos cu 15 minuut pornada, pero asina cu esaki pasa 15 minuut, bo lo ta cometiendo un infraccion y tin chens di haya un boet. “Tin e sistema pa controla esaki, y tambe nos tin manera cu nos por wak esaki” Daou a sigui bisa.

PLACA MERICANO

Placa mericano tambe ta wordo acepta pa e machine. “Tur esaki ta wordo tuma. Placa no ta wordo debolbe pasobra asina e machine ta traha. Nos ta encurasha tur hende pa busca un smartcard, pa asina evita cu bo tin cu cana tur ora cu coins. Anto e lugarnan pa cumpra y recarga bo smartcard, ta hopi” Daou a bisa.

PAKICO PROYECTO DI PARKEER

Intencion di e proyecto di parkeer tabata pa e trahadonan para mas leu y laga lugarnan mas serca pa e clientenan. Asina Daou a splica NoticiaCla.com diaranson mainta. “Esey ta loke ta pasando tambe. A base cu e trahadonan ta parando mas leu, e ta creando espacio enberdad pa mas hende por parkeer mas serca. Esey no ta kita afo, segun Daou, cu enberdad tin basta resistencia ainda contra e proyecto. E ta algo cu a pensa cu lo pasa y cu lo cambia den tempo.