Ola tropical yegando islanan ABC por genera awacero

ORANJESTAD - Un ola tropical ta acercando islanan ABC fe parti oost y asina shelo por ta nubla de bez en cuando y tambe tin chens pa algun yobidanan isola posiblemente acompaña cu strena. Asina METEO ta raporta den su pronostico di tempo di diamars atardi.

DEPRESION TROPICAL GRACE

Pa loke ta e depresion tropical Grace, esaki ta parti central di mar Atlantico y ta moviendo den direccion west. E sistema aki ta basta leu di Aruba y asina no ta forma ningun peliger pa Aruba pero si e lo wordo vigila di cerca dor di e servicio meteorologico.

BONAIRE Y CORSOU

Na Bonaire y Corsou, e sistema aki a crea basta awacero caba den dia awe. Esey no ta nifica cu Aruba tambe necesariamente lo haya e mesun cantidad di awacero. Pero e pronostico ta keda pa tur tres di e islanan, incluyendo pues Aruba.