Disturbio na Colegio basa riba mitar berdad y mentira

ORANJESTAD –Motibo directo pa e disturbio di diamars mainta, segun rector di Colegio Arubano , tabata e hecho cu un maestro a tuma retiro ‘per direct’ dialuna. Asina rector Hans Timmermans a splica NoticiaCla.com diamars merdia. E rector no kier drenta den e polemica directo entre e maestro en cuestion y e scol, pasobra esey ta algo interno. Loke a sosode despues, y conduci na e situacion di diamars mainta, ta un campaña riba Facebook di mitar berdad y mentiranan. Pa e motibo ey e alumnonan no a presenta na e prome dos lesuurnan na scol. Y e rector a splica e mayornan esaki tambe den un carta awe. (lesa e carta aki).

SITUACION INACEPTABEL

“E asunto y mi ta haya inaceptabel” Timmermans ta bisa, indicando cu hendenan no tin un nocion di ki efecto algo asina riba rednan social por tin. “Un docente ta retira, ta pone cos riba Facebook, cu ta crea un sin fin di reaccion rond di mundo, cu bo no tin den man” Timmermans ta bisa. Hasta docentenan di otro scol a reacciona riba e noticianan aki, cu no tin nada di haber cu e caso, segun e rector.

CONMOCION

E ta compronde e conmocion cu tin, pero loke e ta lamenta ta cu siendo cu su oficina ta habri semper, ningun hende a bin puntra kico ta sosodiendo. Entre nan, e ta referi na rumornan cu un biahe (pa Colombia) di HAVO 4 a wordo prohibi. “Mi no sa di nada. Mi lo a bisa cu riba pleintchi di scol (durante pauze), alumnonan mester a papia (solamente) hulandes. Mi no a bisa esey”, Timmermans ta sigura NoticiaCla.com. Asina tambe e rector lo a bisa cu e tin un lista di docente cu lo mester haya nan retiro. “Mi no tin un lista asina” e rector ta sigui bisa. Y ta cosnan asina ta wordo poni riba Facebook, cu ta pone cu e un a bira mas rabia cu e otro, cu tur su consecuencianan. “Nan tur ta reacciona riba nan forma, sin sa si e ta berdad of no”. E hecho cu tur e ‘rumornan aki’ ta circula y ta haya un bida riba nan mes, Timmermans ta haya hopi fastioso. E ta sinti cu tur esaki a wordo inventa y chupa for di e ‘dede grandi’. E rector ta mustra cu ta imposibel pa un grupo di directiva di 5 persona controla 1600 alumno cu tin pauze pareu, si nan ta papia papiamento of no. “Imaginabo si nos ta cana rond y scucha esaki?”.

ACCION MES

For di 1600 alumno, e ta kere cu 600 alumno no a bay e prome dos lesnan (1 ora y mei total). A scucha un grupo di 5, y a splica nan e situacion. Mes momento a sigura cu no tin repercusion pa e alumnonan cu a sinta pafo y no kier a bay les. Lesa aki e carta cu TImmermans a manda pa mayornan awe.