AVB: Aruba ta topa St. Vincent & The Grenadines awe nochi atrobe

ORANJESTAD - Awe mainta trempan e seleccion di Aruba a desayuna hunto, y palabra nan proximo strategia pa awenochi ora cu nan topa St Vincent pa di dos biaha. “Nos ta cla pa e wega di awe. E wega di siman pasa na St. Vincent & The Grenadines tabata hopi fuerte, circumstancianan tabata pisa, un ekipo opositor miho prepara pa hunga riba e veld ey y cu e circumstancianan cu nos a confronta cune y consecuentemente a gana nos. Pero awe diamars ta riba nos veld, na Aruba y bou di nos circumstancianan”, asina Rini Coolen, Bondscoach di e ekipo nacional di futbol di Aruba a duna di conoce durante un conferencia di prensa. Awe nochi pues e seleccion di Aruba ta haya un di dos oportunidad. 

TRES BUELTA

Pa prome bes den historia, e ekipo nacional di futbol di Aruba ta yega e di tres buelta eliminatorio den e cualificacion rumbo pa FIFA World Cup 2018 na Rusia. E bondscoach di e seleccion di Aruba, Rini Coolen, ta trahando cu e departamento tecnico di AVB. Pa medio di un acuerdo di cooperacion (MoU) entre AVB y PEC Zwolle cu ta data for di aña 2014, Coolen ta staciona na Aruba pa su club. Coolen tin hopi experiencia, tanto nacional como tambe internacional.

ENTRENANDO DURO

“Pa loke ta e ekipo di Aruba, nos ta entrenando duro, e hungadonan a custuma cu otro, cu e wega cu nos tin prepara y e tecnica nan”, asina e coach a conta. “Mi ta sinti cu e hungadonan ta bon prepara pa e siguiente wega, nos a mira video, analisa hugadanan, pues nan tin tur conocemento di kico por spera y kico pa haci riba veld”.

STADION YEN

Pa awor, e regalo mas grandi cu e hungadonan aki por haya ta un stadion yen di hende pa apoya nan y duna nan e sosten moral necesario pa por gana e wega contra St. Vincent & The Grenadines. Ta pa prome biaha Aruba ta yega asina leu y awor nos ta cla pa sigui. E wega entre Aruba y St. Vincent and the Grenadines ta cuminsa pa 8:00pm den Compleho Deportivo Guillermo Prospero Trinidad na Dakota.

TICKETS

Tickets ta disponibel na Valero Boulevard, Valero Essoville, Valero Palm Beach y na Urataka Center na Santa Cruz y na Body Manipulations. Tambe por cumpra bo carchi di entrada na oficina di AVB situa den stadion Frans Figaroa na Noord. Entrada ta Afl. 25.00, mientras cu lo tin un special “Early Birds” pa e prome 1000 persona cu cumpra nan ticket, lo haya un prijs special di Afl. 15.00. NOTA: E foto ta di e momento awe mainta ora cu e seleccion tabata desayuna hunto den cede di AVB.